նախընտրելի դարձնելՏավուշի մարզի Մովսես գյուղի 56-ամյա բնակիչ Ա. Բադալյանը հովիվ էր եւ դժբախտ դեպքը տեղի էր ունեցել հենց ոչխարներին հանդ տանելու ժամանակ: Այս մասին NEWS.am-ի թղթակցի հետ զրույցում ասաց Մովսեսի գյուղապետ Արարատ Ավալյանը:
«Անհատական հովիվ էր, այդ օրը գնացել է հանդ, կրակ է վառել, երեւի վատ է զգացել, ընկել է կամ քնել ու այրվել, գուցե ինսուլտ է խփել: Առավոտյան տեսնողներին ասել է, թե վատ է զգում, հետո այդ տարածքում փայտեր կային, դրանից ենք ենթադրում»,- ասաց գյուղապետը:
Նա շեշտեց, որ սա ոչ սպանության, ոչ էլ ինքնասպանության դեպք է, «քանի որ անշառ տղա էր, գյուղացի մարդ, իր համար ապրում էր»:
Գյուղապետը տեղեկացրեց, որ Ա. Բադալյանը ամուսնացած է, ուներ 4 երեխա, երկու դուստրերն ամուսնացած են, ավագ որդին բանակից գալուց հետո խեղդվել է լճում, իսկ կրտսեր որդին զինծառայող է, ծառայում է Լեռնային Ղարաբաղի Հանրապետությունում, ամռանը պետք է զորացրվի:
Հիշեցնենք, որ Տավուշի մարզի Մովսես գյուղի «Կիլի թալա» կոչվող հանդամասում տղամարդու դիակ է հայտնաբերվել, որը կիսայրված վիճակում է եղել: Ավելի ուշ պարզվել է, որ նա նույն գյուղի 56-ամյա բնակիչ Ա. Բադալյանն է: Ոստիկանությունից NEWS.am-ի հետ զրույցում հայտնել են, որ փաստի առթիվ քրեական գործ է հարուցվել, կատարվում է նախաքննություն:Նշանակվել է դատաբժշկական փորձաքննություն:
