նախընտրելի դարձնելԱմենայն հայոց կաթողիկոս Գարեգին Բ-ն մայիսի 7-ին, եղբայրական այցով կմեկնի Վատիկան, ուր մայիսի 8-ին հանդիպում կունենա Հռոմի Կաթոլիկ Եկեղեցու Քահանայապետ Ֆրանցիսկոս Պապի հետ:
Մայր աթոռի տեղեկատվական համակարգից հայտնում են, որ այցի ընթացքում Ամենայն Հայոց Կաթողիկոսին ուղեկցելու են Արգենտինայի Հայոց թեմի առաջնորդ Տ. Գիսակ արքեպիսկոպոս Մուրադյանը, ԱՄՆ Հայոց Արեւելյան թեմի առաջնորդ Տ. Խաժակ արքեպիսկոպոս Պարսամյանը, Մայր Աթոռի Միջեկեղեցական հարաբերությունների բաժնի տնօրեն, Արթիկի թեմի առաջնորդ Տ. Հովակիմ եպիսկոպոս Մանուկյանը, գավազանակիր Տ. Անանիա աբեղա Ծատուրյանը եւ Մայր Աթոռի Տեղեկատվական համակարգի տնօրեն Տ. Վահրամ քահանա Մելիքյանը: Հռոմում պատվիրակությանը կմիանա նաեւ Իտալիայի Հայոց հոգեւոր հովիվ Տ. Թովմա աբեղա Խաչատրյանը: Մայիսի 9-ին Գարեգին Բ Ամենայն Հայոց Կաթողիկոսը Հռոմից կուղեւորվի Ամերիկայի Միացյալ Նահանգներ, ուր հանդիպումներ կունենա Մայր Աթոռի բարերարների հետ` քննարկելու Մայր Աթոռ Ս. Էջմիածնի կողմից իրականացվող զանազան ծրագրեր:
