Ռուսաստանը ձգտում է բառի բուն իմաստով կլանել Հայաստանը, իսկ ԱՄՆ-ն փորձում է հատկապես Արցախի խաղաքարտը շահարկելով՝ իրեն ձեռնտու իրավիճակ ձեւավորել տարածաշրջանում: Այս մասին հայտարարություն է տարածել «Նախախորհրդարանը»:

Հայտարարությունում նաեւ ասվում է.

«22 տարի առաջ՝ 1992 թվականի մայիսի 8-ին հայ ազատամարտիկների անձնազոհ ու գրագետ գործողությունների շնորհիվ ազատագրվեց Արցախի հին մայրաքաղաք Շուշին: Արցախի տարածքում որոշիչ ռազմավարական դիրք ու նշանակություն ունեցող Շուշիի ազատագրումն ըստ էության կանխորոշեց ազգային-ազատագրական պայքարի հայանպաստ ռազմական ելքը:

Ներկայումս աշխարհում եւ տարածաշրջանում տեղի են ունենում աշխարհաքաղաքական փոփոխությունների հերթական փուլի գործընթացներ: Ըստ այդմ՝ սրվել է ուժային կենտրոնների, առաջին հերթին՝ մեր տարածաշրջանում դրանց բեւեռները կազմող Ռուսաստանի եւ ԱՄՆ-ի մրցակցությունը, որն հետզհետե ձեռք է բերում սառը պատերազմի շրջանին բնորոշ կոշտ դիմակայության բնույթ:

Ռուսաստանը ձգտում է բառի բուն իմաստով կլանել Հայաստանը, իսկ ԱՄՆ-ն փորձում է հատկապես Արցախի խաղաքարտը շահարկելով՝ իրեն ձեռնտու իրավիճակ ձեւավորել տարածաշրջանում: Նրանք այնքան են շտապում, որ չեն խորշում իրենց բարձրաստիճան դիվանագետներին որպես էմիսարներ ներկայացնելուց: Այդ մասին են վկայում մեր երկրում ըստ էության ռուսաստանյան տեղեկութային վերահսկողություն սահմանելու անհրաժեշտության վերաբերյալ ՀՀ-ում ՌԴ դեսպան Իվան Վոլինկինի եւ Արցախը նախկին ԼՂԻՄ-ի սահմաններով ու անորոշ կարգավիճակով բանակցությունների առարկա դարձնելու վերաբերյալ ԵԱՀԿ Մինսկի խմբի ԱՄՆ համանախագահ Ջեյմս Ուորլիքի եւ ՀՀ-ում ԱՄՆ դեսպան Ջոն Հեֆերնի համապատասխան հայտարարությունները:

Հայաստանյան ապազգային վերնախավը, որը գոյատեւում է որոշակի մասնաբաժնի դիմաց ազգային շահերի հաշվին իր անձնական ու խմբային նկրտումները օտար տերերի շահերին հարմարեցնելու ու ծառայեցնելու միջոցով, գրեթե իսպառ կորցրել է ինքնուրույն որոշումներ ընդունելու կամքն ու հնարավորությունը եւ ի վիճակի չէ համախմբելու ազգին ու դիմակայելու առկա մարտահրավերներին:

Վերը նշվածի հաշվառմամբ Նախախորհրդարանը հայտարարում է.

1. Շուշիի հաղթանակի շնորհիվ դե ֆակտո ՀՀ մաս դարձած Արցախի հարցի վերջնական լուծման բանալին հայ ժողովրդի ձեռքում է, որն իրականացվելու է ազգային-ազատագրական պայքարի շնորհիվ Հայաստանում հայ ժողովրդի կամքի ու իշխանության վերահաստատմամբ ազգային պետություն ստեղծելուց հետո՝ Արցախում եւ ՀՀ-ում անցկացվելիք հանրաքվեի միջոցով նրանց դե յուրե միավորմամբ:

2. ՀՀ-ն մաս չի կազմելու որեւէ վերպետական կազմակերպության, այդ թվում՝ մեռելածին Մաքսային Միության եւ ցնորական Եվրասիական Միության, իսկ Եվրոպական կամ որեւէ այլ ինտեգրացիային մասնակցելու է այնքանով, որքանով դա չի վնասելու նրա հայակենտրոն եւ հայաստանակենտրոն քաղաքականության նպատակներին:

Նախախորհրդարանը շնորհավորում է հայ ժողովրդին նրա պատմական եւ ռազմավարական ձեռքբերման՝ Շուշիի ազատագրման 22-րդ տարեդարձի առթիվ եւ կոչ է անում հավատարիմ մնալ իր զավակների արյան ու տառապանքի գնով ձեռք բերած Արցախյան հաղթանակին, համախմբվել եւ պետության կառավարումից հեռացնել երկիրն ու նրա շահերը հանձնող հանցավոր վարչախմբին ու ստեղծել ինքնիշխան ազգային պետություն: