նախընտրելի դարձնելՈւկրաինան ոչ մմի դեպքում չի հայտարարել հայ ռեժիսոր Սերգեյ Փարաջանովի «Նռան գույնը» ֆիլմին եւ Կաննում դրա ցուցադրման գործում իր մասնակցության մասին, NEWS.am-ի թղթակցին ասել է Կաննի փառատոնում ուկրաինական տաղավարի ներկայացուցիչ Աննա Կորյագինան:
Նշենք, որ ըստ Ուկրաինայի լրատվամիջոցների, որոնք վկայակոչում են «Երիտասարդություն» կինոփառատոնի տնօրեն Անդրեյ Խալպախչիին, Կաննի փառատոնում Ուկրաինայի ներկայացրած կինոնկարների շարքում ընդգրկված է նաեւ «Հայֆիլմ» կինոստուդիայի կողմից 1968 թ. նկարահանված Սերգեյ Փարաջանովի «Նռան գույնը» ֆիլմը:
Աննա Կորյագինան պարզաբանել է, որ այդ թյուրիմացությունները ուկրաինացի լրագրողների պատճառով են: «Մենք ոչ մի դեպքում չենք հայտարարել, որ «Նռան գույնը» ֆիլմը ներկայացվելու է Ուկրաինայի կողմից: Մամուլի ասուլիսի ընթացքում հայտնեցինք մեր ուրախությունը, որ Ուկրաինայում երկար տարիներ ապրած ռեժիսորի ֆիլմը ցուցադրվելու է Կաննում: Մենք ոչ կերպ մտադրություն չենք ունեցել յուրացնել այդ իրավունքները: Մենք հիանալի գիտենք, որ ֆիլմը վերականգնվել է ԱՄՆ-ում», - ընդգծել է Կորյագինան:
Հիշեցնենք, Կաննի փառատոնում Սերգեյ Փարաջանովի «Նռան գույնը» ֆիլմը կներկայացվի Հայաստանի ազգային կինոկենտրոնի եւ Սկորսեզե հիմնադրամի կողմից, որի շնորհիվ կատարվում է ֆիլմի վերականգնումը:
«Նռան գույնը» Փարաջանովի կինոառակն է հայ աշուղ-բանաստեղծ Սայաթ-Նովայի մասին:
