նախընտրելի դարձնելՎերջին մեկ տարվա ընթացքում երեք անգամ պայթած «Արգիճի» փոքր ՀԷԿ-ի հետագա շահագործումը վտանգ է ներկայացնում շրջակա բնակավայրերի համար: Այս մասին NEWS.am-ի հետ զրույցում ասաց «SOS Արգիճի» նախաձեռնության ղեկավար Վարդան Գալստյանը:
Հիշեցնենք, որ վերջին անգամ ՀԷկ-ի խողովակները պայթել են մայիսի 13-ին, ողողել գյուղի հողատարածքները եւ զգալի վնաս պատճառել ընկերությանը: NEWS.am-ի թղթակիցը հաղորդում է, որ պայթյունի հետեւանքով ՀԷԿ-ի տեխնիկան շրջվել է ձորի կողմը:
«ՀԷԿ-ի գործունեության ընթացքում երրորդ անգամն է, որ պայթում է խողովակ, որը հեղեղում է Վերին Գետաշեն գյուղի հողատարածությունները: ՀԷԿ գործունեությունը վտանգ է իրենից ներկայացնում, քանի որ երբեք չի կարող կանխատեսվել, թե որտեղ կարող է պայթյունը տեղի ունենալ:Եթե բնակավայրի մոտ տեղի ունենա, ապա կարող է ջուրը լցվել տները, մարդկանց խեղդել: Ի՞նչ է սպասում եք, որ նման դեպքեր տեղի ունենան, որ կարողանաք արձագանքել» ,-ասաց Վարդան Գալստյանը:
Նրա խոսքով՝ «Արգիճի» փոքր ՀԷԿ-ի խնդիրն առաջացել է 2010թ.-ից, երբ փորձում էին Արգիճի գետի Գայլաձոր վտակն ուղղել հարեւան մարզ, որպեսզի այնտեղ կառուցեն ՀԷԿ:
«2010թ.-ին մեր պայքարով կարողացանք շինարարությունը կանգնեցնել, սակայն 2012թ.-ին ապօրինի ձեւով՝այսպես ասած քրեաօլիգարխիկ մի խումբ ամբողջ գետը լցրեց խողովակով եւ կառուցեց ՀԷԿ, որն այժմ գործում է»,-ասաց Վարդան Գալստյանը:
Վարդան Գալստյանը նշեց, որ այս անգամ ոչ ոքի չեն բողոքել. «Արդեն այնքան ենք բողոքել, որ բողոքելու իմաստ չկա, կամ ու՞մ բողոքենք»:
Արգիճի փոքր ՀԷԿ-ը շահագործում է «Հիդրոկորպորացիա» ՍՊԸ-ն:
Հիշեցնենք, որ առաջին անգամ խողովակները պայթել են 2013թ. հուլիսի 18-ին, որի հետևանքով ջուրը տարել էր կարտոֆիլի ողջ բերքը: Երկրորդ անգամ ` 2013թ. սեպտեմբերի 10-ին, որի հետեւանով ոչնչացել էր գարու ողջ բերքը:
