Ուկրաինայի խնդրով Ռուսաստանի հետ բանակցություններ վարելու Արեւմուտքի գաղափարին կողմ է արտահայտվել ամերիկացի հայտնի քաղաքագետ,  նախագահ Ջիմի Քարթերի աշխատակազմի ազգային անվտանգության նախկին խորհրդական Զբիգնեւ Բժեզինսկին:

«Ես կողմ եմ Ռուսաստանի հետ գաղտնի բանակցություններ վարելուն», - ասել է Բժեզինսկին ֆրանսիական  «Էքսպրես» ամսագրին:

Խոսելով Ուկրաինայի ապագայի մասին՝ քաղաքագետը նշել է, որ «այն կարող է իր ապագա գոյությունը դիտարկել որպես եվրոպական երկիր՝  առանց ՆԱՏՕ-ին անդամակցելու»:  «Ուկրաինան կարող է նաեւ տնտեսական կապեր պահպանել Եվրասիական միության հետ, որի ստեղծման նախաձեռնությամբ հանդես է գալիս Ռուսաստանը», - նշել է Բժեզինսկին:

Պատասխանելով ՆԱՏՕ-ին Ուկրաինայի անդամակցության վերաբերյալ հարցին՝ Բժեզինսկին հիշեցրել է, որ  «դրա բնակչության զգալի մասը չի ցանկանում, որպեսզի երկիրը անդամակցի այդ կազմակերպությանը»:

«Բացի այդ, Ռուսաստանը դա կընկալեր որպես մարտահրավեր», - նշել է փորձագետը, փոխանցում է ԻՏԱՌ-ՏԱՍՍ-ը: