նախընտրելի դարձնել
Թուրքիայի պետական նավթային Turkish Petroleum Corp. (TPAO) ընկերությունն ուրբաթ ձեռք է բերել ֆրանսիական Total SA ընկերության բաժնետոմսերի փաթեթը` Ադրբեջանի Շահ Դենիզ գազային նախագծում:
1,5 միլիարդ դոլար արժողությամբ գործարքում TPAO-ի մասնաբաժինը 9%-ից ավելացել է մինչեւ 19%, ասվում է Total-ի հայտարարությունում:
Այդպիսով, Թուրքիան դարձել է երկրորդ խոշոր գործընկերը` Եվրոպա կասպիական պաշարներն արտահանելու միջազգային նախագծում, որն այլընտրանք է փնտրում Ռուսաստանի գազի ներկրմանը:
«Այդ համաձայնագրի օգնությամբ մենք գործընկերներ կդառնանք Կասպիական բոլոր նախագծերում», - ասել է Թուրքիայի էներգետիկայի նախարար Թաներ Յըլդըզը: Ըստ Total –ի հայտարարության` ֆրանսիական ընկերությունը գործընկերությունից դուրս է եկել 20 միլիարդ դոլար ակտիվների վաճառքի ծրագրի շրջանակներում, փոխանցում է Vesti.ru-ն:
Թուրքիայի պետական Boru Hatlari Ile Petrol Tasima A.S. (BOTAS) ընկերությունը պայմանագիր է կնքել Տրանսանատոլյան գազատարում իր մասնաբաժինը 20% -ից մինչեւ 30% ավելացնելու մասին, որը Թուրքիային ադրբեջանական գազ է մատակարարելու:
Սպասվում է, որ Տրանսանատոլյան գազատարը շահագործվելու է 2018թ.: Ամեն տարի Շահ Դենիզից այն մատակարարելու է 16 միլիարդ խմ գազ, որոնցից 6 միլիարդ խմ-ը կուղղվեն Թուրքիայի ներքին սպառմանը, իսկ մնացած մասը` Եվրոպա:
