Հողային ռեսուրսների դեգրադացիան, որը տեղի է ունենում կամ սաստկանում կլիմայի փոփոխության պատճառով, ոչ միայն վտանգ է կենսամիջոցների համար, այլեւ սպառնալիք՝ ուղղված խաղաղությանն ու կայունությանը: Այս մասին նշված է Անապատացման դեմ պայքարի համաշխարհային օրվա առթիվ ՄԱԿ-ի Գլխավոր քարտուղար Բան Կի-Մունի ուղերձում:

Ուղերձում նաեւ ասվում է.

«Նախազգուշացնող նշանները պարփակված են անասնապահությամբ ու հողագործությամբ զբաղվող՝ ավելի բերրի հողերի համար մրցակցող ֆերմերների հակամարտությունում եւ սակավացող ջրային ռեսուրսների համար համայնքների միջեւ մղվող պայքարում: Անապահովության ախտանշանները տեսանելի են պարենի համաշխարհային շուկայի անկայունության մեջ, ներքին տեղահանություններում եւ զանգվածային միգրացիայում:

Թեպետ հողային ռեսուրսների դեգրադացիան առանձնակի սրությամբ զգացնել է տալիս աշխարհի չորային տարածքներում, սակայն շուրջ 80 տոկոսն ի հայտ է գալիս այս տարածքներից դուրս: Ավելի քան 1,5 միլիարդ մարդ գոյատեւում է դեգրադացիայի ենթարկվող հողերում, նրանց մեծ մասը՝ մանր ֆերմերներ: Կլիմայի փոփոխությունն ուղղակիորեն ազդում է նրանց արտադրողականության վրա: Շատ տարածաշրջաններում քաղցրահամ ջրի պաշարները պակասում են, բերքատու հողատարածքները՝ փոփոխվում, իսկ բերքատվությունը՝ նվազում:

Կանխատեսվում է, որ ամբողջ աշխարհում անկանխատեսելի եւ ծայրահեղ եղանակը էլ ավելի մեծ ազդեցություն կունենա մթերքի արտադրության վրա: Աշխարհի բնակչության աճի պայմաններում հրատապ անհրաժեշտություն է ջանքերի գործադրումը բոլոր բերքատու հողային ռեսուրսների եւ դրանցից կախված համայնքների դիմակայունության մեծացման ուղղությամբ: Պետք է կարողանանք կառավարել հողի կայունությունը, խուսափել հետագա դեգրադացիայից եւ վերականգնել ու բուժել այն, ինչ վնասվել է: Ավելի քան 2 միլիարդ հեկտար հող վերկանգնման եւ բուժման ներուժ ունի: Հարկ է գործողություն ձեռնարկել՝ արագացնելու այդ տարածքների վերականգնումը:

Դեգրադացիայի ենթարկվող հողային ռեսուրսների վերականգնումը բազմաթիվ օգուտներ կտա: Մենք կարող ենք կասեցնել կլիմայի փոփոխության ամենավատ ազդեցությունները, արտադրել ավելի շատ սննդամթերք եւ թուլացնել ռեսուրսների համար ընթացող մրցակցությունը: Կարող ենք պահպանել էկոհամակարգի կենսականորեն անհրաժեշտ գործառույթները, որոնցից է խոնավության կուտակումը, ինչը պաշտպանում է մեզ ջրհեղեղներից կամ երաշտներից: Իսկ հողերի վերականգնման համապարփակ եւ լայնամասշտաբ մոտեցման արդյունքում կարող են ստեղծվել նոր աշխատատեղեր, գործարար հնարավորություններ եւ կենսամիջոցներ, ինչը հնարավորություն կտա բնակչությանը ոչ թե սոսկ գոյատեւել, այլեւ բարգավաճել:

Անապատացման դեմ պայքարի համաշխարհային օրվա այս տարվա թեման է՝ «Հողը պատկանում է ապագային, եկե՛ք պաշտպանենք այն կլիմայի ազդեցությունից»: Դա հնարավո՛ր է իրականացնել, ինչպես ցույց են տվել Բուրկինա Ֆասոն, Նիգերիան եւ Մալին, որոնք վերականգնել են ավելի քան 5 միլիոն հեկտար դեգրադացիայի ենթարկված հող: Եկե՛ք ոգեշնչվենք այս եւ այլ օրինակներից ու պաշտպանենք եւ խնամենք հողը՝ այս ու ապագա սերունդների համար: