նախընտրելի դարձնել
Կոպենհագենում, հունիսի 21-ին, բացվել է «EuroScience2014 (ESOF2014)» համաժողով-փառատոնը, որին 75 երկրներից մասնակցում էր շուրջ 4500 մարդ եւ Նոբելյան վեց մրցանակակիր:
Համաժողովի պաշտոնական բացումը տեղի ունեցավ հունիսի 22-ին, որին ներկա էին եւ բացման խոսքով հանդես եկան Դանիայի թագուհի Մարգրեթ Երկրորդը, Եվրահանձնաժողովի նախագահ Ժոզե Մանուել Բարոզուն, Դանիայի բարձրագույն կրթության եւ գիտության նախարար Սոֆի Կարստեն Նիելսենը: Պաշտոնական բացման ժամանակ տեղի ունեցավ նաեւ քննարկում CERN-ի տնօրեն Ռոլֆ Դիտեր Հոյերի եւ նրա գործընկեր Ֆաբիոլա Ջանոտտիի մասնակցությամբ:
Այս համաժողովը համարվում է Եվրոպայի ամենամեծ եւ հեղինակավոր գիտական համաժողովներից մեկը եւ անցկացվում է երկու տարին մեկ անգամ, որին հավաքվում են մեծ թվով գիտնականներ, գիտության եւ կրթության տարբեր բնագավառների ներկայացուցիչներ:
«ESOF 2014» համաժողով-փառատոնի հիմնական թեմաներն են կրթության վերապատկերացումները, թվայնացման դարում կրթության եւ գիտության խնդիրները, «կամուրջների» ստեղծումը ինչպես գիտական տիրույթներում, այնպես էլ գիտության եւ հասարակության միջեւ:
Համաժողովի շրջանակներում Կոպենհագենում տեղի է ունենում նաեւ «Գիտությունը քաղաքում» փառատոնը, որին ակնկալվում է ավելի քան 30000 մարդու այցելություն:
Այս տարի «EuroScience Open Forum (ESOF2014)» համաժողովին զուգահեռ անկացվող այս փառատոնում Հայաստանը ներկայացված է «Թումո» ստեղծարար տեխնոլոգիաների կենտրոնի, Հայկական Վիրտուալ Համալսարանի, Dasaran.am-ի, «Woodpecker», «Instigate» կազմակերությունների միջոցով, որոնք մասնակցելու են նաեւ ESOF-ի շրջանակներում հունիս 26-ին անցկացվելիք «Re-imagining education» թեմայով աշխատանքային սեմինարին:
Հայաստանի համար հատկացված տաղավարում ներկայացված են մի շարք նորարարական տեխնոլոգիաներ եւ արտադրություն: Ցուցահանդեսի այցելուներն անձամբ իրենց ձեռքերով կարող են փորձարկել կրթական նորարարական գործիքներ, ինչպիսիք են 3D տպիչները, ռոբոտները եւ առցանց խաղերը` բոլորն էլ նախագծված եւ կյանքի կոչած հայ մասնագետների կողմից:
«EuroScience Open Forum (ESOF2014)» համաժողով-փառատոնին Հայաստանը ներկայացվել է «AmStream» հասարակական կազմակերպության ջանքերի շնորհիվ, որում համախմբված են շուրջ 20 հայ եւ դանիացի երիտասարդ գործարարներ եւ մասնագետներ:
«AmStream»-ի աշխատանքներին աջակցել է Դանիայում ՀՀ դեսպանությունը:
