Ոչ ոք շահագրգռված չէ Եվրոպայի նոր  բաժանմամբ, Գերմանիայի մայրաքաղաքում հայտարարել է ՆԱՏՕ-ի գլխավոր քարտուղար Անդերս Ֆոգ Ռասմուսենը՝ ԳԴՀ կանցլեր Անգելա Մերկելի հետ հանդիպման ավարտից հետո: Դրանով նա մեկնաբանել է Ռուսաստանի եւ Արեւմուտքի  տեսակետների տարբերությունը՝ Ուկրաինայի ճգնաժամի հարցում: 

Ռասմուսենը կարծում է, որ  ներկայիս իրավիճակը «սպառնում է անվտանգությանը եւ խաղաղությանը, որը ձեռք էր բերվել Բեռլինի պատի անկումից հետո»: Ըստ նրա՝  «ոչ ոք չի ցանկանում, որպեսզի նորից սառը պատերազմ սկսվի», փոխանցում է ԻՏԱՌ-ՏԱՍՍ-ը:

«Մենք չենք ցանկանում նոր բաժանարար գծեր մեր  մայրցամաքում», - ասել է Ռասմուսենը: «Ես Ռուսաստանին կոչ եմ անում նորից  խորհել իր ուղղության մասին», որպեսզի սկսվի վստահության վերականգնման գործընթացը, նշել է նա: 

ՆԱՏՕ-ն հավատարիմ է իր անդամների անվտանգությունն ապահովելու գաղափարին, հենց այդ պատճառով էլ դաշինքը «հետագա քայլեր կձեռնարկի, եթե հարկ լինի», նշել է Ռասմուսենը:  «Մեր ձեռնարկած բոլոր միջոցները տեղին են պաշտպանության տեսակետից եւ ամբողջությամբ համապատասխանում են  մեր միջազգային պարտավորություններին», - հայտարարել է նա: