նախընտրելի դարձնել
Նախկինում «Իրաքի եւ Լեւանտի իսլամական պետություն» կոչվող «Իսլամական պետություն» խմբավորման սուննի զինյալները ոչնչացրել են իրենց կողմից զավթված Իրաքի հյուսիսում գտնվող Մոսուլ քաղաքի մի շարք տաճարներ ու հուշարձանային համալիրներ, հաղորդում է «Ալ-Արաբիա» հեռուստաընկերությունը:
Հեռուստաալիքի փոխանցմամբ, Իրաքի հյուսիսային նահանգ Նայնավայի մայրաքաղաքի հյուսիսային շրջաններից մեկում առնվազն 4 սուննիական հուշարձանային համալիրներ, ինչպես նաեւ 6 շիայական մզկիթներ են ավիրվել: ԻՊ խմբավորման ակտիվիստների կողմից համացանցում հրապարակված լուսանկարներում երեւում է՝ ինչպես են ոչնչացվում մուսուլմանական սրբազան շինությունները բուլդոզերների, ինչպես նաեւ պայթուցիկ նյութերի կիրառմամբ:
Տեղացի բնակիչները հեռուստաալիքին պատմել են, որ ներկա պահին ԻՊ զինյալները շրջափակել են նաեւ երկու քաղաքային տաճարները:
«Մենք շատ ենք վշտացել, որ մեր հայրերից ու նախահայրերից ժառանգված այդ սրբությունները ոչնչացվել են», - հեռուստաալիքին հայտարարել է տղամարդը, հաղորդում է «ՌԻԱ Նովոստին»:
Մինչեւ վերջերս Սիրիայում պատերազմող «Իրաքի եւ Լեւանտի իսլամական պետություն» սուննի խմբավորումը, հունիսի կեսերին գլխավորել է Իրաքի հյուսիսային եւ հարավային շրջանների վրա հարձակումը:
Շաբաթվա ընթացքում զինյալներին հաջողվել էր գրավել Իրաքի տարածքի զգալի մասը, ներառյալ Իրաքի երկրորդ մայրաքաղաք Մոսուլը, Սալահ-էդ-Դին նահանգի մի մասը Տիկրիտ քաղաքի հետ:
