նախընտրելի դարձնել
Պաշտոնական այցով Չիլիի Հանրապետությունում գտնվող նախագահ Սերժ Սարգսյանը հուլիսի 11-ին հանդիպում է ունեցել Չիլիի նախագահ Միշել Բաշելեի հետ:
Մինչ այդ, Հանրապետության նախագահը ծաղկեպսակ է դրել Չիլիի ազգային հերոս գեներալ Բեռնարդո Օ’Հիգինսի հուշարձանին եւ հարգանքի տուրք մատուցել:
Չիլիի Նախագահի նստավայրում՝ «Մոնեդա» պալատում, ՀՀ նախագահի դիմավորման պաշտոնական արարողությունից հետո կայացել է նախագահներ Սերժ Սարգսյանի եւ Միշել Բաշելեի հանդիպումը:
Հայաստանի եւ Չիլիի նախագահները քննարկել են հայ-չիլիական միջպետական կապերի ամրապնդմանն ու համագործակցության զարգացման հեռանկար ունեցող մի շարք ոլորտներում համատեղ ջանքերի ներդրման հետ կապված հարցերի լայն շրջանակ:
Ափսոսանքով նշելով, որ Հայաստանի եւ Չիլիի միջեւ հարաբերությունները Հայաստանի անկախացումից ի վեր ցանկալի տեմպով չեն ընթացել, զրուցակիցները համակարծիք են եղել, որ ժամանակակից աշխարհում նույնիսկ աշխարհագրական հեռավորությունն այլեւս խոչընդոտ չէ, հատկապես այն պարագայում, երբ երկու ժողովուրդներն էլ իրենց զարգացման ուղին կառուցում են միեւնույն արժեքների հիման վրա: ՀՀ նախագահն ընդգծել է, որ իր այցը միտված է լրացնելու տարիների այս բացը եւ հարաբերությունների նոր փուլ սկսելու երկկողմ հարաբերությունների շարունակական զարգացման նպատակով:
Հանդիպմանը երկուստեք կարեւորվել է Հայաստանի եւ Չիլիի միջեւ իրավապայմանագրային դաշտի ձեւավորումը, որը, կողմերի համոզմամբ, նոր հնարավորություններ կբացի ինչպես քաղաքական, այնպես էլ առեւտրատնտեսական փոխգործակցության զարգացման համար:
Այս համատեքստում նախագահ Սերժ Սարգսյանը ողջունել է մեկ ամիս առաջ Երեւանում կայացած առաջին բիզնես-սեմինարը, որի ժամանակ լատինաամերիկյան տարածաշրջանով հետաքրքրված հայ գործարարներին ներկայացվել են Չիլիի հետ գործարար կապեր հաստատելու հնարավորությունները:
Հեռանկարային է համարվել մի շարք ոլորտներեւմ, այդ թվում` գյուղատնտեսության եւ հատկապես գինեգործության բնագավառում փոխգործակցությունը: Հայ-չիլիական համագործակցության ընդլայնման համատեքստում Հայաստանի եւ Չիլիի նախագահները ոչ պակաս կարեւոր են համարել գիտակրթական, մշակութային, զբոսաշրջության ու սպորտի բնագավառներում փոխգործակցության երկուստեք խրախուսումն ու զարգացումը: Հատկապես այս ոլորտները, ըստ նրանց, կարող են նպաստել նաեւ երկու բարեկամ ժողովուրդների միջեւ ակտիվ շփումներին ու փոխճանաչելիությանը:
ՀՀ նախագահի համոզմամբ, միջպետական կապերի ամրապնդման տեսանկյունից կարեւոր է նաեւ այն հանգամանքը, որ Հայաստանի եւ Չիլիի մոտեցումներն ու դիրքորոշումները համամարդկային նշանակության կարեւորագույն հարցերի շուրջ համահունչ են: Դրա վառ ապացույցը, ըստ Սերժ Սարգսյանի 2007թ. Չիլիի կողմից Հայոց ցեղասպանությունը պաշտոնապես ճանաչելն էր` շահելով աշխարհի համայն հայության անմնացորդ համակրանքն ու հարգանքը` որպես անկեղծ եւ հուսալի բարեկամ:
Երկու երկրների միջեւ բարեկամական հարաբերությունների զարգացման գործում նախագահներն ընդգծել են Չիլիում փոքրաթիվ հայ համայնքի համեստ, բայց միեւնույն ժամանակ ուրույն դերակատարումը:
Հանդիպման ավարտին երկու երկրների նախագահների ներկայությամբ Հայաստանի եւ Չիլիի արտաքին գործերի նախարարները ստորագրել են «ՀՀ արտաքին գործերի նախարարության եւ ՉՀ արտաքին գործերի նախարարության միջեւ համագործակցության մասին» փոխըմբռնման հուշագիր: Այնուհետ Չիլիի նախագահ Միշել Բաչելետի անունից՝ ի պատիվ պաշտոնական այցով Չիլիի Հանրապետությունում գտնվող նախագահ Սերժ Սարգսյանի, տրվել է պաշտոնական ճաշ:
Իր բաժակաճառում Նախագահ Միշել Բաշելետը եւս մեկ անգամ ողջունել է ՀՀ նախագահին եւ նրա գլխավորած պատվիրակությանը Չիլիում, ընդգծել, որ իր համար մեծ պատիվ է եւ ուրախություն առաջին անգամ Չիլի պաշտոնական այց կատարած Հայաստանի Հանրապետության նախագահին հյուրընկալելը. «Ինչպես տեղյակ եք, պարոն նախագահ, դեռեւս տասնիններորդ դարից հայերը եկել են Չիլի բնակություն հաստատելու: Ընդհանրապես, Չիլին այն երկիրն է, որը միշտ հանգրվան է տալիս այստեղ եկող մարդկանց: Նրանք լայնորեն ընդգրկվել եւ կարողացել են լավագույնս ինտեգրվել մեր հասարակությանը, քանի որ Չիլիի հասարակությունն ունի մեծ հանդուրժողականություն եւ հարգանք: Ծագումով հայ չիլիացիները, ինչպես տեսաք եւ ես այսօր մեր զրույցի ընթացքում էլ ասացի, մեծապես նպաստել են Չիլիի հասարակության կայացմանն ու զարգացմանը` ինչպես քաղաքական, տնտեսական, գործարար շրջանակներում, այնպես էլ մշակույթի եւ սպորտի բնագավառներում: Փաստորեն, երբ ես պաշտպանության նախարար էի, այն ժամանակ մենք ունեինք ծովակալ Հեռնան Կույումջյան: Չիլին իր երախտագիտությունն է հայտնում այն աջակցության համար, որ հայազգի ներկայացուցիչները ցուցաբերում են:
Այսօր մեր դիվանագիտական հարաբերություններն արդեն հասել են հասունության մի շրջանի, որ մենք պետք է շարունակենք քաղաքականապես այն խորացնել: Ուզում ենք եւս մեկ քայլ անենք, որպեսզի կրճատենք այս աշխարհագրական հեռավորությունը: Պետք է չթողնենք, որ այդ հեռավորությունը մեզ իրարից բաժանի, այլ, ընդհակառակը` կորողանանք աշխատել եւ՛ առեւտրի, եւ՛ տնտեսության ոլորտներում: Ինչպես ես քիչ առաջ կայացած մեր հանդիպման ժամանակ ասացի, Չիլին կարողացել է տնտեսական հարաբերություններ զարգացնել շատ երկրների հետ եւ կնքել ազատ առեւտրի պայմանագրեր` զարգացնելով նաեւ իր տնտեսությունը: Եվ մենք կարող ենք շարունակել նման համագործակցությունը` հաշվի առնելով այն Փոխըմբռնման հուշագիրը, որն այսօր ստորագրվեց մեր երկու արտգործնախարարությունների միջեւ: Այդ հուշագիրը մեզ հնարավորություն կտա, որպեսզի ավելի պաշտոնականացնենք մեր քաղաքական հարաբերությունները եւ խորհրդատվությունները, ճանապարհ բացենք առեւտրատնտեսական հարաբերությունների համար:
Հարգարժան պարոն նախագահ, ուզում եմ իմ գոհունակությունը հայտնել Ձեզ՝ այցի համար, այստեղ Ձեր ներկայության համար, որը մեզ հնարավորություն է տալիս քննարկելու եւ նոր ուղիներ փնտրելու համագործակցության համար»,- ասել է Չիլիի նախագահը:
