Նախընտրելի«Հայաստանում սահմանադրական կարգը չի գործում, որովհետեւ այն հիմնարար սկզբունքները, որոնք ամրագրված են Սահմանդրության առաջին երկու հոդվածներում ի սկզբանե եղել են կասկածի տակ: Խոսքը գնում է ե´ւ ժողովրդավարության մասին, որը ենթադրում է ազատ ընտրություններ, ե´ւ իրավական պետության մասին, որը ենթադրում է օրենքի անվերապահ գերակայությունը»,- NEWS.am-ի թղթակցի հետ զրույցում հուլիսի 5-ին` Հայաստանի Սահմանադրության ընդունման օրը, նման կարծիք հայտնեց սահմանադրագետ Վարդան Պողոսյանը:
«Սահմանադրությունը որպես երեւույթ, որպես իրավաբանական փաստաթուղթ, մեր իրավագիտակցության մեջ դեռեւս տեղ չունի, խորհրդային ժամանակներում Սահմանադրությունն ընդամենը քաղաքական փաստաթուղթ էր եւ հռչակագրային նշանակություն ուներ, անկախությունից հետո եւս երկրում սահմանադրական մշակույթ չարմատավորվեց: Դրա պատճառով Սահմանադրության բազմաթիվ դրույթներ երկրում չեն գործում»,-նշեց նա:
Խոսելով սահմանադրական բարեփոխումների մասին` Պողոսյանը նշեց, որ դրանց կարիքն այսօր չկա:
«Խնդիրը բարեփոխելու մեջ չէ: Խնդիրը գործող սահմանադրությունը ճիշտ կիրառելու մեջ է»,-ասաց սահմանադրագետը` հավելելով, որ 2005 թվականի բարեփոխումներից հետո մեր Սահմանադրությունն ունի բավականին մեծ ժողովրդավարական ներուժ:
«Չեմ կարծում, որ հաճախակի բարեփոխումները կբերեն Սահմանադրության ավելի ճիշտ ու հետեւողական կիրառմանը»,-ամփոփելով իր խոսքը՝ նշեց նա:
