Միջազգային Facebook սոցիալական ցանցը որոշել է փակել վիրտուալ նվերների խանութը։

Հիշյալ նախագծի պատասխանատու Ջարեդ Մորգենսթերնը հայտնել է, որ այսուհետ Facebook օգտագործողները չեն կարող  վիրտուալ ծննդյան տորթեր, ծաղիկներ եւ փուչիկներ ուղարկել իրենց ընկերներին։   Ըստ նոր որոշման՝  2007-ից  գործող վիրտուալ նվերների խանութը օգոստոսի 1-ից դադարեցնելու գործունեությունը։ Սակայն օգոստոսի 1-ից հետո էլ նախկին ուղարկված նվերները կայքում կցուցադրվեն։

Նշենք, որ Insidefacebook.com-ի զեկույցի համաձայն՝  Facebook-ի այցելուները վերջին շրջանում զգալի պակասել են, որի պատճառով, Facebook-ը  այցելությունների քանակով գրանցել է վերջին ժամանակների ամենացածր ցուցանիշը։

Իր հերթին Facebook-ի ստեղծող Մարկ Զուքերբեգը օրերս նշել է, որ Facebook-ը համարյա դառնում է աշխարհի թիվ 1 սոցիալական ցանցը։

«Մենք այս պահին 500 մլն անդամ ունենք։ Աշխարհում միայն 3 երկրում մենք դեռեւս առաջատար սոցիալական ցանց չենք։ Դրանք են՝ Ռուսաստանը, Ճապոնիան եւ Չինաստանը։ Մինչ այս տարվա վերջը նախատեսում ենք մեր անդամների թիվը հասցնել 1 միլիարդի։ Այս պահին Ռուսաստանում 1 մլն անդամ ունենք»,-ամփոփել է Facebook-ի ստեղծողը։

Ի դեպ, Հայաստանում եւս Facebook-ը մեծ տարածում է գտնում՝ նեղելով ռուսական Odnoklassniki.ru-ին։