ՆախընտրելիԹուրքիայի Վան քաղաքում ապրող զույգը իրենց պսակադրությունը իրականացրել է Վանա լճում` նավի վրա, իսկ հարսանեկան արարողությունը` Աղթամար կղզում:
Փեսացուն նախօրոք պայմանավորվել էր ամուսնությունը գրանցող մարմնի հետ, եւ նավ էր վարձել` պսակադրությունը Վանա լճում իրականացնելու համար: Փեսացուն հարսին անակնկալ մատուցելու համար չէր տեղեկացրել իր մտադրության մասին, եւ հարսնացուի աչքերը կապած բերել էր նավահանգիստ:
Հենց լճում` նավի մեջ, ամուսնությունը գրանցող գործակալը իրականացրել է պսակադրությունը, որից հետո նավապետը անձամբ է նորապսակներին հանձնել ամուսնության վկայականը:
Այնուհետ հարսանեկան նավը հասել է Աղթամար կղզի, որտեղ նորապսակները հիացել են հայկական ճարտարապետական հրաշք Սուրբ Խաչի գեղեցկությամբ, եւ կղզում կենդանի երաժշտության ուղեկցությամբ շարունակել իրենց հարսանեկան արարողությունը:
Հարսնացուն, տպավորված նման գեղեցիկ արարողությունից, բոլոր զույգերին կոչ է արել պսակադրությունները իրականացնել Վանա լճում:
