Հաագայում գտնվող ՄԱԿ-ի միջազգային դատարանն այսօր`  հուլիսի 22-ին կհրապարակի իր եզրակացությունը Սերբիայից Կոսովոյի միակողմանի  անկախության հռչակման օրինականության վերաբերյալ:

Ավելի քան 40 երկրներ ներկա կլինեն Հաագայի դատարանի դահլիճում, որտեղ այդ հարցով վճիռը դատարանի նախագահ կկարդա Հիսասի Օվադան:

Նման հանյցով դատարան  դիմել ՄԱԿ-ի գլխավոր ասամբլեան 2008-ի հոկտեմբերի 8-ին` Սերբիայի խնդրանքով: Այն ժամանակ այդ որոշման օգտին քվեարկել էին 77 պատվիրակություններ, 6 երկիր դեմ է արտահայտվել, եւս 74-ը` ձեռնպահ են մնացել: Միջազգային դատարանը այս խնդրի քննարկումն սկսել է 2008-ի հոկտեմբերի 10-ից:

Հաագայի դատարանում Կոսովոյի միակողմանի անկախություն հռչակելու հարցով երկշաբաթյա լսումներ են կայացել 2009-ի դեկտեմբերին: Բացի Սերբիայից ու Կոսովոյից, այդ լսումների ժամանակ հանդես են եկել 27 երկրների ներկայացուցիչներ:

Նշենք, որ միջազգային դատարանի որոշումը պարտադիր բնույթ չի կրելու: Որոշ փորձագետներ ենթադրում են, որ դատարանի որոշումը լինելու է երկիմաստ կամ լղոզված եւ հնարավոր չի լինելու այն միանշանակ մեկնաբանել այս կամ այն կողմի օգտին, որպեսզի նախադեպ չստեղծվի, որ մյուս երկրներն էլ նույն սկզբունքով ցանկանան անջատվել միմյանցից:

Հաագայի դատարանի որոշումը կայացվելու են 15 դատավորների քվեարկության արդյունքում:

Ներկայումս մթնոլորտը Սերբիայում ու կոսովոյում շատ լարված է. Բոլորը սպասում են միջազգային դատարանի որոշմանը: Այսօր երեկոյան նախատեսված է Սերբիայի կառավարության արտահերթ նիստ: