Առաջ մեծերի հանդեպ հարգանքն ավելի շատ էր, քան այսօր:  բայց դե ինչ անենք, 21-րդ դարն է, պետք է համակերպվենք: Այս մասին այսօր՝ մայիսի 31-ին, NEWS.am-ի հետ զրույցում ասաց  Արման Խաչատրյանը (Արմուշ), որը  Հյուսիսային պողոտայում մասնակցում է Երեխաների պաշտպանության օրվան նվիրված ամենամյա բարեգործական ակցիային. «Շատ տարբերություն կա մեր ժամանակի ու այժմյան երեխաների միջեւ, մենք ավելի շատ էինք հարգում մեծերին: Չնայած դա էլ է դաստիարակության հարց,  ընդամենը ծնողները պետք է իրենց երեխաների դաստիարակությանն ավելի շատ ուշադրություն դարձնեն, որպեսզի լավ սերունդ մեծանա: Մանկությունս անցել է Խորհրդային Հայաստանում, ունեցել եմ ակտիվ մանկություն, շատ չարաճճիություններ եմ արել, լավ մանկություն եմ ունեցել»:

Նշենք, որ Երեւանի Հյուսիսային պողոտայում ընթանում է NEWS.am-ի ամենամյա բարեգործական ակցիան, որը շարունակվելու է մինչեւ 20:00-ն:

Օրվա ընթացքում վաճառված պաղպաղակից  գոյացած հասույթն ամբողջությամբ կփոխանցվի Հայաստանի սահմանամերձ Դարանակ եւ Փամբակ գյուղերի (հայ-ադրբեջանական սահման, Գեղարքունիքի մարզ) դպրոցահասակ անապահով երեխաներին:

Բարեգործական ակցիային աջակցել են «Թամարա», «Երեւան Կաթ» , «Կոկա-Կոլա»,  «Happyk»  ընկերությունները, «Երազանք» թատերախումբը, Երեւանի պատանի հանդիսատեսի թատրոնը, Երեւանի Կենտրոն վարչական շրջանի թաղապետարանը:

Հիշեցնենք, որ NEWS.am լրատվական-վերլուծական գործակալությունը երեխաների միջազգային օրվա կապակցությամբ ամեն տարի կազմակերպում է բարեգործական ակցիա, որից ստացված ամբողջ հասույթը փոխանցվում է կարիքավոր երեխաներին: