Իրանի մեջլիսը վերջնականապես ընդունել է Իրանի Իսլամական Հանրապետության միջուկային ծրագրի համաձայնագրի պահանջների մասին օրենքը, հայտնում է ԻՐՆԱ գործակալությունը։

«Մեջլիսը հավանություն է տվել օրինագծին, որը կառավարությանը պարտավորեցնում է հարգել միջուկային ոլորտում իրանցի ժողովրդի իրավունքներն ու նվաճումները»,- հաղորդում է գործակալությունը։

Խորհրդարանի բաց նիստում օրինագիծն ընդունվել է 213 կողմ ձայնով, գրում է ՏԱՍՍ-ը։

Համաձայն օրինագծի՝ Իրանի եւ «վեցնյակի» միջեւ բանակցությունների արդյունքները օրենքի ուժ կունենան, եթե հաշվի առնվեն հետեւյալ պայմանները.

Միջուկային համաձայնագրի ընդունման օրը պետք է չեղյալ հայտարարվեն Իրանի նկատմամբ գործող բոլոր պատժամիջոցները

ԱԷՄԳ-ին թույլատրվելու է շարքային ստուգումներ անցկացնել միջուկային օբյեկտներում, ընդ որում, չի թույլատրվում մուտք գործել Իրանի ռազմական  եւ ոչ միջուկային այլ օբյեկտներ, ուսումնասիրել այդ օբյեկտների փաստաթղթերը եւ հարցումներ անցկացնել իրանցի գիտնական ատոմագետների շրջանում։

Անընդունելի է խաղաղ միջուկային ոլորտի զարգացման ցանկացած սահմանափակում, որոնք վերաբերում են գիտահետազոտական եւ տեխնոլոգիական մշակումներին։

Մեջլիսի ընդունած օրենքը պահանջում է, որ բանակցությունների արդյունքները ուղարկվեն Իրանի խորհրդարանի քննարկմանը։