նախընտրելի դարձնելՀայաստանում ռուսական ռազմաբազաների տեղակայման վերաբերյալ պայմանագրում Հայաստանը պետք է հավելում առաջարկի, որը թույլ կտա պաշտպանության տակ առնել նաեւ Ղարաբաղը: Նման տեսակետ է հայտնել ՍԴՀԿ պերկուպերկյանական թեւի ներկայացուցիչ, պատգամավոր Վարդան Խաչատրյանը:
«Ռուսաստանի հետ Գյումրիի ռազմաբազայի գործունեությունն առավել ընդգրկուն դարձնելու փաստաթղթի մեջ մեր խորին համոզմամբ պետք է ներառվի Հայաստանի հարակից տարածքներում ՀՀ անվտանգությանը սպառնացող զարգացումների մասին ռազմավարական դաշնակցի պատասխանատվության խնդիրը, ինչը, մեր տեղեկություններով, առ այսօր դրված չէ»,- նշել է Վ. Խաչատրյանն ու նկատում, որ «միջազգայնորեն» ճանաչված սահմանների պահպանման պատասխանատվությունը դուրս է դնում Արցախն ու ազատագրված տարածքները եւ անվիճելիորեն բազմապատկում Ադրբեջանի կողմից ռազմական գործողությունների սանձազերծման վտանգը:
«Հայկական կողմը, մեր համոզմամբ, պետք է հավելի համաձայնագրի տեքստը` ՀՀ հարակից տարածքներում վտանգավոր զարգացումների դեպքում դաշնակցի պատասխանատվության աստիճանը: Վերջինիս բացառման դեպքում մենք ռիսկի ենք ենթարկում Արցախը եւ ուրվագծում ենք այն որպես ռազմական պոլիգոն»,- ասել է նա:
Ինչ վերաբերում է ՀԱՊԿ-ից դուրս գալու եւ արեւմտյան անվտանգության համակարգի մեջ ինտեգրվելու մասին առաջարկներին, Վ. Խաչատրյանն ասել է. «Խիստ տարփողված պատերազմի վտանգի պայմաններում անվտանգության համակարգի փոփոխությունը նույնն է, թե ձիերը փոխենք գետանցման պահին: Սա աքսիոմատիկ ճշմարտություն է, որի չիմացությունը կարող է հանգեցնել մեր պետության եւ ազգի համար ամենավատ եւ ծայրահեղ հետեւանքների»:
