նախընտրելի դարձնելՎրաստանի նախագահ Միխայիլ Սահակաշվիլին եւ Մոլդովայի նախագահի պաշտոնակատար Միխայ Գիմպուն այցելել են Սեւ ծովի ափին գտնվող վրացական Անակլիա ավանում տեղակայված «հայրենասերների ճամբար», որտեղ հանգստացող երեխաների առաջ հանդես են եկել ռուսերենով:
«Փետրվարին ես ինչ-որ տեղ էի թռչում եւ հանկարծ լրագրում տեսա «լեգո» խաղը, որն ունի նաեւ իմ որդին: Ես էլ մտածեցի, որ դա կարելի է հավաքել որպես ճամբար: Նախագահի առավելությունն այն է, որ նա կարող է անել ինչ-որ բան, հավաքել ու անել: Սկզբունքորեն, նախագահները փոքրիկ երեխաներ են, որոնք կարող են ինչ-որ բան կառուցել եւ հավաքել, ոչ թե ուղղակի խոսել ու խոստանալ»,- ասել է Սահակաշվիլին, հաղորդում է Rosbalt-ը:
Նրա խոսքով, երեխաների տարբերությունը մեծերից այն է, որ երեխաները սիրում են կոնկրետ բաներ, ոչ թե ուղղակի խոսակցություններ ու խոստումներ:
«Ամեն մի մեծահասակի մեջ պետք է երեխա լինի, որպեսզի ինչ-որ բան իրականացնի: Մենք շատ ենք սիրում բելառուսներին, մոլդովացիներին, ուկրաինացիներին, հայերին, ադրբեջանցիներին, ռուսներին, բոլոր այլ մարդկանց, որոնք ապրել են ընդհանուր պետության` Խորհրդային Միության մեջ: Ինչպիսին էլ լինեն քաղաքական կտրուկ փոփոխությունները, ինչպիսին էլ լինեն պայմանականությունները, իսկ դրանք, ցավոք, կան, մենք միեւնույն է, պետք է դրանք հաղթահարենք»,- հայտարարել է Վրաստանի նախագահը, նշելով, որ Անակլիայի ճամբարում հանգստացել են իրենց հասակակիցները Հայաստանից եւ այլ երկրներից:
