նախընտրելի դարձնելՇվեդիայում ապրող թուրքերը լրջորեն անհանգստացած են, որ այդ երկրում կայանալիք խորհրդարանական ընտրություններում կարող են հաղթանակ տանել ընդդիմադիր ձախ կուսակցությունները, որոնց ջանքերի շնորհիվ Հայոց ցեղասպանության ճանաչման վերաբերյալ նախագիծն ընդունվեց Շվեդիայի խորհրդարանում: Նրանք ակտիվ քարոզչություն են իրականացնում, խորհուրդ տալով ընտրողներին առաջիկա ընտրություններում ձայն չտալ ընդդիմադիրներին։
Թուրքական Haberx-ի փոխանցմամբ՝ Շվեդիայում ապրող թուրքերը դիմում են իրենց ազգակիցներին` հորդորելով սեպտեմբերի 19-ին անցկացվելիք խորհրդարանական ընտրություններում ձայն չտալ ընդդիմադիր «Սոցիալ-դեմոկրատական», «Ձախ», «Կանաչների եւ շրջակա միջավայրի» կուսակցություններին:
Հիշյալ կուսակցությունները հայտարարել են, թե իշխանության գալու դեպքում, Հայոց ցեղասպանության ճանաչման հարցը տեղափոխելու են ՄԱԿ-ի օրակարգ, ինչպես նաեւ Հայոց ցեղասպանությունը ներառելու են Շվեդիայում դպրոցական պատմության դասագրքերում։
Հիշեցնենք, որ վերոնշյալ 3 կուսակցությունների ջանքերով Շվեդիայի խորհրդարանը 2010-ի մարտի 11-ին 131 կողմ եւ 130 դեմ ձայներով ընդունեց Հայոց ցեղասպանությունը դատապարտող բանաձեւը։ Ընդունված բանաձեւում հիշատակվում են նաեւ Պոնտոսի հույների եւ ասորիների ցեղասպանությունները։
