նախընտրելի դարձնել
Իրանն իր միջուկային ծրագրի սահմանափակման ուղղությամբ անհրաժեշտ գործողությունները կիրականացնի մինչեւ տարեվերջ, այդ ժամանակ էլ կսկսվի Համատեղ համապարփակ գործողությունների ծրագրի «իրականացման օրը», երբ կհանվի Իրանի դեմ սահմանված պատժամիջոցների մեծ մասը: Այս մասին Վիեննայում բանակցություններից հետո հայտարարել է Իրանի ԱԳ փոխնախարար Աբբաս Արակչին:
Նա հավելել է, որ Իրանը, հնարավոր է, ցենտրիֆուգների ապամոնտաժումը կսկսի առաջիկա օրերին:
ՌԻԱ Նովոստիի փոխանցմամբ, Արակչին նաեւ տեղեկացրել է, որ Իրանը մտադիր է հարստացված ուրանի պաշարները վաճառել՝ բնական ուրանի մատակարարման դիմաց: Այդ առիթով Թեհրանը բանակցություններ է վարում միանգամից մի քանի երկրների հետ:
Ըստ ՏԱՍՍ-ի, Իրանը պետք է կտրուկ նվազեցնի իր հարստացրած ուրանի պաշարները, ՄԱԳԱՏԷ-ի վերահսկողության տակ դնի իր ցենտրիֆուգների հիմնական մասը:
