նախընտրելի դարձնել
Մալդիվյան հանրապետության փոխնախագահ Ահմեդ Ադիբը, որը ձերբակալվել է պետական դավաճանության կասկածով, ավելի վաղ ներքաշված է եղել տխրահռչակ «Արթուր եղբայրների» հետ կապված սկանդալի մեջ:
Հոկտեմբերի 24-ին համաշխարհային լրատվամիջոցները հաղորդել են Ադիբի ձերբակալության մասին, որին կասկածում են երկրի նախագահ Աբդուլլա Յամինի նկատմամբ մահափորձի մեջ:
Նշենք, որ եղբայրները Ադիբի հետ լուսանկարվել էին 2013-ի ավտոմրցարշավի ժամանակ, երբ վերջինս զբոսաշրջության նախարարի պաշտոնն էր զբաղեցնում:
Նմանատիպ հրապարակումների հայտնվելուց հետո նախարարն անմիջապես հերքել է Արթուր Սարգսյանի եւ Արթուր Մարգարյանի հետ իր կապի վերաբերյալ լուրերը: Պաշտոնյան հայտնել է, որ վերջիններս իրեն խնդրել են լուծել պարզեցված վիզաների հետ կապված խնդիրը եւ ինքը, զբոսաշրջության նախարար լինելով, օգնել է նրանց: Ադիբն ընդգծել է, որ ինքը եղբայրների հետ ծանոթացել է ավտոմրցարշավի ընթացքում եւ նրանց քրեական գործունեության մասին տեղյակ չի եղել:
Հիշեցնենք, որ «Արթուր եղբայրները» ներքաշված էին Քենիայում բռնկված թմրասկանդալի մեջ: Սակայն զարմանալիորեն կարողացել էին մեկնել երկրից: Հետագայում նրանք Մալդիվներում էին հայտնվել, որտեղ լուսանկարվել էին զբոսաշրջության նախարար Ահմեդ Ադիբի եւ պաշտպանության նախարար Մուհամեդ Նազիմի հետ: Լուսանկարները մեծ իրարանցում են առաջացրել եւ նույնիսկ երկրի խորհրդարանում քննարկման առարկա են դարձել: Որոշ պատգամավորներ նշել են, որ եղբայրները վտանգ են ներկայացնում Մալդիվների ազգային անվտանգության համար:
