Google-ը հայտարարել է իր Google+ սոցցանցի վերագործարկման մասին` զգալիորեն փոփոխելով նրա ֆունկցիոնալությունը: Այդ մասին տեղեկացնում է  Lenta-ն` վկայակոչելով Techcrunch-ին:

Ընկերությունում նշում են, որ Google+-ը հիմնականում օգտագործում են քննարկումների համար եւ նորարարությունները պիտի այդ գործընթացն ավելի պարզ ու հարմար դարձնեն:  Այժմ շեշտը դրված է նրա երկու գործառույթի վրա`  «հավաքածուներ» եւ «ընկերակցություններ», իսկ մնացածը նվազագույնի են հասցված: Օրինակ, օգտատերերը զրկվել են հանդիպումներ կազմակերպելու եւ գեոնիշեր թողնելու հնարավորությունից:

«Հավաքածուներ» գործառույթը մայիսին է ավելացվել Google+-ին, այն հնարավորություն է տալիս որոշակի թեմատիկայով` օգտատերերի կոնկրետ հակումներին համապատասխանող էջեր ստեղծել:  

Մասնակիցները կարող են այնտեղ լուսանկար եւ տեսանյութ հրապարակել, հղումներ տեղադրել, ինչպես նաեւ բաժանորդագրվել կոնկրետ  «հավաքածուների» թարմացումներին: «Ընկերակցությունները» սոցցանցում հայտնվել են դեռեւս երեք տարի առաջ, այդ գործառույթը մարդկանց թույլ է տալիս խմբերի մեջ միավորվել ընդհանուր թեմաներ քննարկելու համար:  

Google+ սոցցանցը ստեղծվել էր 2011-ի հունիսին, բայց երեք տարի անց ընդամենը   400 միլիոն ակտիվ օգտատեր ուներ, իսկ ընկերության այլ ծառայությունների կողմից ավելորդ ժողովրդականացման համար  օգտատերերի ու վիդեոբլոգերների կանոնավոր ծաղրին էր արժանանում: Մասնավորապես, Google+ -ի վերաբերյալ  անընդհատ կատակներ էր անում YouTube-ային կատակերգու Ռեյ Ուիլյամ Ջոնսոնը, որն ավելի քան   10 միլիոն բաժանորդ ունի:

Ավելի վաղ` նոյեմբերին Google-ն ընդլայնեց իր մի շարք ծառայություններ: Ռուս օգտատերերը  մուտք ստացան  Google Flights ագրեգատորին, որը հնարավորություն է տալիս ներքին եւ միջազգային չվերթների համար ավիատոմսեր փնտրել:  Իսկ Google Search որոնողական հավելվածը սովորեց պատասխանել բարդ ձեւակերում ունեցող հարցերի: Արդյունքում ծառայությունն այժմ ոչ միայն կարող է առանցքային բառերով որոնումների ցուցակ ներկայացնել, այլեւ ուղղակի պատասխան տալ հարցին: