նախընտրելի դարձնելԵրեւանի Շենգավիթ համայնքում այսօր՝ դեկտեմբերի 24-ին, գործող «Գուդվին» բուքմեյքերական գրասենյակում սպանված հայտնաբերվածը «Գուդվինի» աշխատակից 28-ամյա Արթուր Նազարյանն է: Այս մասին NEWS.am-ի թղթակցի հետ զրույցում հայտնեցին դեպքի վայրում հավաքվածները:
Արթուր Նազարյանի դին հայտնաբերել է նրան հերթափոխելու եկած աշխատակիցը, որն էլ ահազանգել է ոստիկանություն:
Ըստ դեպքի վայրում աշխատող իրավապահների՝ տղամարդու դիակի վրա հրազենային վնասվածքներ չկան: Առայժմ հայտնի չէ՝ ինչով են սպանել Արթուր Նազարյանին: Գրասենյակում ամեն ինչ ջարդուփշուր է արված, հատակը՝ ամբողջությամբ պատված է արյունով: Իրավապահները կասկածներ ունեն, որ աշխատակիցը սպանվել է կոտրված ապակե իրերի կտորտանքներից մեկով:
Դեպքի վայրում հավաքվածները հայտնում են, որ դեռ հաստատված չէ, գրասենյակի դրամարկղից գումար գողացել են, թե ոչ:
«Տարածքում տեսախցիկ չկա, պարզ չէ՝ գողություն արել են թե, ոչ, հիմա քննիչներն աշխատում են, կպարզվի դեպքի հանգամանքները»,-ասաց բուքմեյքերական գրասենյակի առջեւ հավաքվածներից մեկը:
Այժմ դեպքի վայրում աշխատում են ոստիկանության Շենգավիթի բաժնի ոստիկանները եւ քննիչները հաստատեցին ոստիկանության լրատվական ծառայությունից:
Դեպքի հանգամանքները պարզվում են: Նշանակվել է դիակի դատաբժշկական փորձաքննություն, որից հետո պարզ կլինի, թե Արթուր Նազարյանն ինչ վնասվածքներից է մահացել:
