Սեպտեմբերի 10-ի երեկոյան ժամը 18:30-ի սահմաններում, Կենտրոն վարչական շրջանի Այգեստան թաղամասում, Ջոն Կիրակոսյանի անվան (նախկին Ձերժինսկու) դպրոցի աստիճանների մոտ,  10-ից ավելի երիտասարդներ «Ռազբորկա» են անում (ֆոտոռեպորտաժ): Երիտասարդները եղել են հիմնականում «ՋԻՓ» մակնիշի ավտոմեքենաներով:

Ֆոտոլրագրող Գագիկ Շամշյանի փոխանցմամբ, մինչեւ ոստիկանության Կենտրոնի բաժնի եւ Նորք Մարաշ բաժանմունքի աշխատակիցները` Կենտրոնի ոստիկանապետի տեղակալ Գրիշա Ամիրխանյանի եւ Երեւանի ճանապարհային ոստիկանության պետ Արսեն Արշակյանի գլխավորությամբ` կհասցնեին ժամանել «ռազբորկայի»,  երիտասարդները հասցրել են անհետանալ` դպրոցի բակում թողնելով իրենց հետ բերած ռետինե մահակները:

Դեպքի վայրում սկսել են աշխատել փորձաքրեագետները: Ականատեսները ոստիկաններին են փոխանցել փախուստի դիմած մի քանի մեքենաների համարանիշները:

Դպրոցի հարեւանությամբ ապրող բնակիչներն ասել են, որ կռվում խառնված են եղել իրենց հայտնի ոստիկան Սիմոն Աղազարյանի հարազատներից մի քանիսը: NEWS.am-ի ունեցած տեղեկություններով, Սիմոն Աղազարյանը ոստիկանության նախկին աշխատակից է, ով իրավապահ համակարգում պատասխանատու պաշտոններ է վարել: Մասնավորապես, նա եղել է ոստիկանության Խորհրդային շրջանի Ավանի բաժանմունքի պետի տեղակալ, այնուհետեւ` քրեական հետախուզության բաժանմունքի պետ:

Լուսանկարը եւ տեսանյութը` Գագիկ Շամշյանի