նախընտրելի դարձնելԻրանի համար դժվար կլինի արդյունահանումն ավելի մեծացնել, քան օրական 500 հազար բարելով: NEWS.am-ի թղթակցին նման կարծիք է հայտնել Բրանդեյսի համալսարանի (ԱՄՆ) Մերձավոր Արեւելքի տնտեսության դասախոս Նադեր Հաբիբին:
Հանրապետությունը կարող է դժվարություններ ունենալ նոր հաճախորդների հետ աշխատանքում, որովհետեւ միջազգային բանկերը դեռեւս անհանգացած են ԱՄՆ-ի պատժամիջոցներով, հավելել է նա:
Այնուամենայնիվ, արտահանման տեխնիկական խնդիրներ չկան, որովհետեւ հունվարի 16-ին նավթային սեկտորի վրայից ամբողջությամբ հանվել են պատժամիջոցները: Նավթի գները շատ ցածր են, բայց եթե Իրանը մրցունակ գներ առաջարկի, կարող է գնորդներ գտնել, համարում է փորձագետը:
Նավթի մատակարարման հետ կապված բարդություններ եւս չեն ծագի, որովհետեւ Իրանը սեփական նավերն ու ապահովագրությունն է օգտագործում: Հետեւաբար, պետք չէ զգուշանալ, թե արտասահմանցի ապահովագրողները չեն ցանկանա գործ ունենալ Թեհրանի հետ:
Այդ պատճառով գործող հաճախորդներին մատակարարումները ոչ մի դժվարություն չեն առաջացնի, բայց նոր հաճախորդներին վաճառքը գուցե մի փոքր ավելի բարդ լինի դեռեւս առկա մտավախությունների պատճառով:
Նշենք, որ ֆրանսիական տնտեսական Les Echos թերթի գնահատականների համաձայն, 2012-ին ԵՄ-ի պատժամիջոցներից հետո Իրանում նավթի արդյունահանումը նվազել է օրական 4 մլն բարելից (2011) հասնելով մինչեւ 2,7 մլն-ի (2015-ի հոկտեմբերին), իսկ արտահանումը` օրական 2,2 մլն-ից մինչեւ 1,1 մլն-ի:
Ինչպես վերջերս հայտնել է Իրանի նավթի նախարար Բիջան Զանգանեն, հանրապետությունում նավթի արդյունահանումը պատժամիջոցների վերացումից անմիջապես հետո կարող է աճել օրական 500 հազար բարելի չափով, իսկ մինչեւ 2016-ի վերջ` 1 մլն բարելով:
