ՆախընտրելիՀայաստանի Սահմանադրական Դատարանը իր սեպտեմբերի 14-ի որոշմամբ, ՀՀ Սահմանադրությանը հակասող եւ անվավեր է ճանաչել «Մարդուն օրգաններ եւ (կամ) հյուսվածքներ փոխպատվաստելու մասին» ՀՀ օրենքի 7-րդ հոդվածի մասը, որն առնչվում է Հայաստանում չիրականցվող փոխպատվաստման հանգամանքներում դիակային դոնորից օրգաններ եւ (կամ) հյուսվածքներ վերցնելուն:
Օրենքի 7-րդ հոդվածի՝ ՀՀ Սահմանադրությանը համապատասխանելու հարցը ՍԴում վիճարկել է ՀՀ Մարդու իրավունքների պաշտպան Արմեն Հարությունյանը:
Գործի դատաքննության նախապատրաստման փուլում մասնագիտական փորձագիտական եզրակացություն ստանալու համար Սահմանադրական Դատարանը դիմել էր Հանրային Խորհրդին:
ՀԽ առողջապահական հարցերով կոլեգիան հարցը քննարկել է իր հունիսի 3-ի ընդլայնված նիստում, որին մասնակցում էին նաեւ Մարդու իրավունքների պաշտպան Արմեն Հարությունյանը եւ Ազգային Ժողովի՝ Առողջապահության հարցերով հանձնաժողովի նախագահ Արա Բաբլոյանը:
Կոլեգիան՝ հաշվի առնելով, որ քննարկմանը հնչած ելույթները այս ոլորտի հետ կապված լուրջ խնդիրներ վեր հանեցին, որոշել է դրանք դարձնել փորձագիտական լուրջ ուսումնասիրության թեմա Հանրային Խորհրդում, իսկ քննարկումները վերսկսել ՍԴ համապատասխան որոշումից հետո՝ անկախ նրանից, ինչպիսին կլինի այն:
