նախընտրելի դարձնել
Անհայտ անձինք սեպտեմբերի 26-ի լույս 27-ի գիշերը Դաղստանի Կարաբուդախքենդի շրջանում հարձակվել եւ գնդակահարել են ոստիկանության բաժանմունքի աշխատակցին ու նրա ընտանիքի անդամներին։ Արդյունքում սպանվել է ոստիկանը եւ նրա դուստրը։
«Անհայտ անձինք տնից դուրս են կանչել ոստիկանին, ու երբ նա դուրս է եկել` կրակել են վերջինիս ուղղությամբ։ Կրակոցի ձայն լսելով դուրս են եկել նաեւ ոստիկանի կինն ու աղջիկը, որոնց վրա եւս կրակել են»,- հաղորդում է Դաղստանի ներքին գործերի նախարարությունը։
Ոստիկանը եւ նրա դուստրը մահացել են տեղում, իսկ կինը բազմաթիվ վնասվածքներով տեղափոխվել է հիվանդանոց։
Դեպքի առթիվ հարուցվել է քրեական գործ «սպանության», «անօրինական զենք պահելու» եւ «իրավապահ մարմնի աշխատակցի նկատմամբ ոտնձգությունն կատարելու» հոդվածներով։ Հնարավոր է, որ հանցագործներին դատապարտեն ցմահ բանտարկության:
