նախընտրելի դարձնելՈստիկանական համակարգում կրճատումները հնարավոր են: Այս մասին, այսօր՝ մայիսի 28-ին, Սարդարապատում Հայաստանի Առաջին հանրապետության 98-րդ տարեդարձին նվիրված տոնակատարության ժամանակ, լրագրողների հետ զրույցում նշել է ՀՀ ոստիկանապետ Վլադիմիր Գասպարյանը:
Հարցին, թե հնարավո՞ր է կրճատումներ լինեն ոստիկանական համակարգում, նա պատասխանել է. «Իհարկե հնարավոր է: Կառավարությունը կապ չունի այդ առումով, քանի որ մենք բարեփոխումների ծրագիրը իրականացնում ենք էտապներով, այնպես որ անընդհատ պրոցես է, ամեն տարի մենք ունենում ենք կրճատումներ: Կենտրոնական ապարատներից, ավելի պասիվ ծառայություններից տեղափոխում ենք տեղեր, դրանց հաշվին են դպրոցների ոստիկանները, դրանց հաշվին է արտաքին ծառայության ուժեղացումը»:
Նրա խոսքով, կրճատում է մի տեղից ու տեղափոխում է մի ուրիշ տեղ. «Մենք ստեղծել ենք համայնքային ոստիկաններ, դպպրոցական ոստիկաններ: Բյուրոկրատական ապարատից վերցնում ենք եւ տեղափոխում ենք այնտեղ, որտեղ մեծ շփման մակերես կա հասարակության հետ»:
Հարցին, թե ինչու է գաղտնի պահվում ոստիկանների թիվը, Վլադիմիր Գասպարյանն արձագանքել է. «Դա ոստիկանապետից չի կախված, այլ օրենքից: Այդ օրենքն էլ ընդունել են ժամանակին պատգամավորները, որ էդ հարցը բարձրացնում են»:
Ինչ վերաբերում է պատգամավորների կողմից հնչող մեղադրանքներին, թե տպավորություն է, որ ապրում ենք ոստիկանական երկրում, Գասպարյանն ասաց. «Ոստիկանացված պետության մասին կարող են խոսել մարդիկ, որ սարսափելու տեղ ունեն ոստիկանությունից: Իսկ դուք չեք համարո՞ւմ, որ ոստիկանը առավոտից առավոտ ծառայում է, օգնություն է ցույց տալիս քաղաքացիներին: Եթե դա ոստիկանական պետություն է, ես այդ ոստիկանական պետության կողմնակիցն եմ»:
