նախընտրելի դարձնել
Facebook ընկերությունն աջակցում է Ֆրանսիայի իշխանություններին, որոնք հետաքննում են Փարիզի մոտակայքում ոստիկանի սպանության դեպքը։ Այս մասին ասված է ընկերության հայտարարության մեջ, փոխանցում է AFP–ն։
«Մենք սերտորեն համագործակցում ենք Ֆրանսիայի իշխանությունների հետ, որոնք հետաքննում են սարսափելի ողբերգությունը»,– ասված է հաղորդագրության մեջ։
Ընկերությունից նշել են, որ ահաբեկչության եւ դրա քարոզչության հետ կապ ունեցող գրառումները տրամադրում են դրանք ստանալուն պես։
Ավելի վաղ հայտնի էր դարձել, որ մարդասպանը դեպքի վայրից Facebook սոցիալական ցանցի օգնությամբ ուղիղ հեռարձակում է վարել։
Հիշեցնենք, որ հունիսի 14-ի գիեշրը 25-ամյա Լարոսսի Աբբալլահը Փարիզի մոտակայքում հարձակվել էր իր հարեւան ոստիկանի վրա եւ սպանել նրան` դանակի մի քանի հարված հասցնելով որովայնին, որից հետո պատանդ էր վերցրել նրա կնոջը եւ երեխային: Չարագործին սպանել էին ոստիկանական հատուկ ջոկատի գործողության ընթացքում: Կինը, որը եւս ՆԳՆ կառույցներում էր ծառայում, զոհվել է, երեք տարեկան երեխան ողջ է մնացել:
Աբբալլահը իրավապահ մարմիններին հայտնի էր որպես թալանի եւ ահաբեկչական խմբի գործունեության մասնակից, 2013 թավականին նա երեք տարվա ազատազրկման էր դատապարտվել: Աբբալլահի անունը շրջանառվում է նաեւ այն մարդկանց ցուցակում, որոնք կապված են Սիրիա մեկնած անձանց հետ: Ոստիկանությունը հետեւել է կասկածյալին, այդ թվում` գաղտնալսել է նրա կապի միջոցները, բայց նախապատրաստվող հարձակման մասին տվյալներ չի ստացել:
