Ինֆորմացիոն տեխնոլոգիաների ձեռնարկությունների միության (ԻՏՁՄ) եւ Ucom ընկերության միջեւ ստորագրված համագործակցության հուշագրի համաձայն՝ վերջինս ներդրումներ է կատարում, որպեսզի Հայաստանի 9 մարզերում բացվեն «Արմաթ» անվանումը կրող  շուրջ 70 ինժեներական խմբակ-լաբորատորիաներ։

Նախագիծը նպատակ ունի խթանելու տեխնոլոգիական կրթությունը Հայաստանի համայնքների բոլոր դպրոցներում, նպաստելու աշակերտների մոտ ժամանակակից բարձր տեխնոլոգիաների նկատմամբ հետաքրքրության առաջացմանը, վաղ տարիքից ճարտարագիտական մտածելակերպի զարգացմանը եւ բանիմաց ուսանողների նախապատրաստմանը։

Ս.թ. հունիսի 10-14-ը «Արմաթ» ինժեներական խմբակ-լաբորատորիաները բացվեցին Գեղարքունիքի մարզումՎարդենիկի կրթահամալիրի, Մարտունու Գեղհովիտի դպրոցի, Մարտունու ավագ դպրոցի, Գավառի եւ Կարմիր գյուղի երկու հիմնական դպրոցների, Ծովագյուղի միջնակարգ դպրոցի,  Սեւանի ավագ դպրոցի, Դդմաշենի միջնակարգ դպրոցի, Տավուշի մարզում սահմանամերձ Ոսկեպարի, Սեւքարի ուԱյգեհովիտի դպրոցների, ինչպես նաեւ, Ազատամուտի, Իջեւանի թիվ 5 հիմնական դպրոցի ու նշված բնակավայրերին կից գյուղերում բնակվող աշակերտների համար։

Նախագիծը հնարավորություն է տալիս գործնականորեն աջակցելու Հայաստանի եւ համաշխարհային շուկայում որակյալ ՏՏ մասնագետների ինտեգրման, նրանց միջեւ փորձի փոխանակման, նաեւ՝ ՏՏ ոլորտում մեծ ծավալի ներդրումների ներգրավման գործընթացին։ Հատկանշական է, որ խմբակներում մշակված ծրագրային փաթեթները, ինչպես նաեւսարքավորումների գծագրերը բաց են հանրության համար։ Համակարգչային ծրագրերն ու համակարգերը հնարավորինս հայաֆիկացվում են, իսկ նախագծի իրականացման շրջանակներում սարքավորումներ եւ ծրագրային միջոցներ ձեռք բերելիս նախապատվություն է տրվում տեղական արտադրողին, ինչի վառ օրինակ են հանդիսանում Հայաստանում արտադրված բարձրակարգ եռաչափ (3D) տպիչները, մինի համակարգիչները, ռոբոտաշինության հավաքածուները եւ այլ սարքերը։

ԻՏՁՄ գործադիր տնօրեն Կարեն Վարդանյանը, խոսելով ծրագրի ռազմավարական նշանակության մասին, նշում է, - «Մեր նպատակն է վերականգնել Հայաստանի՝ որպես ինժեներական երկրի իմիջը: Բացի այդ, ապրիլյան իրադարձությունները եւս մեկ անգամ ապացուցեցին, որ միայն ինժեներական գիտելիքն է մեզ հնարավորություն տալու ստեղծել ժամանակակից ռազմական լուծումներ»: Կ. Վարդանյանը նաեւ ընդգծել է, որ այս քայլով իրենք նպաստում են մարզային զարգացմանը: Ինժեներական լաբորատորիաներում տեխնոլոգիական կրթություն ստացած աշակերտներն առաջիկայում կկարողանան ստեղծել ստարթափ ընկերություններ եւ հոգալ իրենց ընտանքի ու համայնքի կարիքները»:

«Որպես Հայաստանում ստեղծված եւ աշխատող ընկերություն մենք առանձնահատուկ կերպով կարեւորում ենք սահմանամերձ բնակավայրերի աշակերտների ներգրավվածությունը նախագծում եւ վստահ ենք, որ Հայաստանի ցանկացած մարզում բնակվող ՏՏ մասնագետն իր գիտելիքներով եւ հմտություններով չի զիջելու աշխարհի առաջատար ՏՏ-ընկերություններում աշխատող օտարերկրյա մասնագետներին», - ասել է Ucom ընկերության տնօրեն Հայկ Եսայանը։