նախընտրելի դարձնել
IBM եւ Weather Company ընկերությունները կմիավորեն ջանքերը ինքնաթիռների թռիչքներն ավելի ապահով դարձնելու համար, հայտնում է Life-ը:
Եղանակի կանխատեսման Weather Company ծառայության տվյալներն օգտագործելով` IBM Watson ստորաբաժանումը կկարողանա օպերատիվ եղանակով ավիաընկերություններին զգուշացնել թռիչքի գոտիներում օդերեւութաբանական բարդ պայմանների մասին: Տեղեկատվության փոխանակման համար կօգտագործվեն Gogo ընկերության ռեսուրսները, որն ինքնաթիռներում Wi-Fi անթել կապով մուտք է ապահովում ինտերնետ:
Weather Company ընկերության ղեկավար Քեմերոն Քլեյթոնի խոսքով, «այն, ինչ ավտոմեքենաների համար անում է Waze-ը, մենք կանենք ավիաընկերությունների համար »:
Ամեն տարի տուրբուլենտության հետ կապված խնդիրների պատճառով ԱՄՆ-ի ավիաընկերությունները մոտ 100 մլն դոլար են կորցնում: Ծախսերը կապված են ուղեւորների եւ անձնակազմի վնասվածքների եւ ինքնաթիռների արտապլանային տեխնիկական սպասարկման հետ:
2015-ին IBM-ը 2 մլրդ դոլարով ձեռք է բերել Weather Company-ի թվային բիզնեսը: IBM-ը ստացել է եղանակային հավելվածները, ենթակառուցվածքը եւ ընկերության թվային բիզնեսի այլ բաղադրիչներ: Դա IBM-ին թույլ է տվել նոր հնարավորություններն ինտեգրել Watson-ի եւ ընկերության ամպային ծառայությունների մեջ:
