Նախընտրելի
Հոկտեմբերի 11-ին Հայաստանի պաշտպանության նախարարությունում մեկնարկել են պաշտպանական հարցերի վերաբերյալ մեկշաբաթյա հավաք-պարապմունքներ, որոնց մասնակցում են ՀՀ պետական կառավարման մարմինների բարձրաստիճան պաշտոնյաներ:
ՊՆ մամուլի ծառայությունից NEWS.am-ին հայտնում են, որ պարապմունքների ընթացքում նախատեսված են ՀՀ ՊՆ եւ ԶՈՒ Գլխավոր շտաբի բարձրաստիճան սպաների կողմից դասախոսությունների, ինչպես նաեւ կրակային պատրաստության վարժանքի անցկացում:
Հավաք-պարապմունքները բացել է Պաշտպանության նախարար Սեյրան Օհանյանը` հանդես գալով պաշտպանական բարեփոխումների վերաբերյալ դասախոսությամբ: Ներկայացնելով պաշտպանական բարեփոխումների ուղղությունները, ընթացքը եւ հետագա աշխատանքները` Սեյրան Օհանյանը նշել է, որ բարեփոխումների արդյունքում ակնկալվում է ունենալ մարտական բարձր պատրաստականությամբ օժտված զինված ուժեր, որոնք ռազմավարական զսպման համակարգի շնորհիվ կարող են հակառակորդին ստիպել զերծ մնալ ռազմական գործողություններ սկսելու արկածախնդրությունից:
Կարեւորելով պաշտպանական հարցերի շուրջ միասնական մոտեցումների անհրաժեշտությունը, Սեյրան Օհանյանը նշել է, որ պետական բարձրաստիճան պաշտոնյաների համար 2009 թվականից ի վեր կազմակերպվող ամենամյա դասախոսությունները նպատակ ունեն ամրապնդել ռազմական անվտանգության ապահովման համակարգում պետական բոլոր կառույցների սերտ փոխգործակցությունը, ինչպես նաեւ պետական կառավարման համակարգի ներկայացուցիչների մոտ բարձրացնել ռազմական անվտանգության ապահովման հարցում սեփական պարտականությունների ու իրավասությունների վերաբերյալ իրազեկության մակարդակը:
