Ֆրանսիական AXA Group ապահովագրական ընկերության ներկայացուցիչների Բաքվում կատարած բացահայտ հայտարարությունն  այն մասին, որ նրանք փոխհատուցում են վճարել Հայոց ցեղասպանության զոհերի ժառանգներին, խառնաշփոթ է առաջացրել տեղի լրագրողների մոտ:

Ադրբեջանական АPА գործակալության հաղորդմամբ, АХА MedLa Region ընկերության  նոր շուկաների զարգացման գծով տնօրեն  Ֆեդերիկ Ֆլեժյուն նշել է, որ նրանք մտադիր չեն մեկնաբանելու անցյալի իրադարձությունները: 

AXA Group-ը շուրջ 7 հազար հայերի վճարել է 12.7 մլն  եվրո փոխհատուցում: Ավելի վաղ նա փոխհատուցում էր վճարել նաեւ Հոլոքոստի զոհերին:

Հետաքրքական է այն, որ այսօր Բաքվում ստորագրվել է համաձայնագիր, որով MBASK ադրբեջանական ընկերությունն իր բաժնետոմսերի հսկիչ փաթեթը  (51 տոկոս) վաճառել է AXA Group-ին:

Նշենք, որ Ադրբեջանում համառորեն փորձում են ժխտել Հայոց ցեղասպանությունը: