Հայաստանի վարչապետ Տիգրան Սարգսյանն այսօր` հոկտեմբերի 15-ին ընդունել է երկօրյա այցով Հայաստանում գտնվող Իրանի էներգետիկայի նախարար Մաջիդ Նամջուին եւ նրա գլխավորած պատվիրակությանը։

Կառավարության մամուլի ծառայությունից NEWS.am-ին հայտնում են, որ վարչապետը, մասնավորապես, ընդգծել  է, որ հայ-իրանական հարաբերություններում էներգետիկայի ոլորտը միշտ եղել է առաջատարներից  մեկը, որը նոր հնարավորություններ կընձեռի   այլ ոլորտներում  եւս փոխգործակցությունն ամրապնդելու եւ զարգացնելու:

Մաջիդ Նամջուին  Տիգրան Սարգսյանին է  փոխանցել  Իրանի նախագահի եւ  ժողովրդի ողջույնները եւ հավաստել իր երկրի պատրաստակամությունը` Հայաստանի հետ  ամրապնդելու եւ զարգացնելու հարաբերությունները, մասնավորապես էներգետիկայի ոլորտում։ Այդ համատեքստում զրուցակիցները քննարկել են երկու երկրների էներգետիկ բնագավառում իրականացվող ծրագրերը, կարեւորել  արդեն ընթացքի մեջ գտնվող էներգետիկ խոշորագույն ծրագրերից մեկի` Մեղրի ՀԷԿ-ի կառուցման նախագիծը։

Քաղաքական համաձայնությունները, որ ամրագրվել եւ ամրապնդվել են երկու երկրների  նախագահների միջեւ Իրան-Հայաստան երկաթգծի  նավթամթերքների խողովակաշարի կառուցման վերաբերյալ, ըստ վարչապետ Տիգրան Սարգսյանի, իրենց գործնական արտացոլումն են  գտնում  փոխգործակցության միջոցով։ Վարչապետը հույս է հայտնել, որ նմանատիպ ենթակառուցվածքների ստեղծումը բարենպաստ պայմաններ ստեղծել  երկու երկրների տնտեսությունների զարգացման համար։ Այդ առումով, կարեւորվել է էներգետիկ ոլորտում նախատեսված ծրագրերի ժամանակին իրագործումը, որում երկու պետություններն էլ շահագրգիռ են։

Տնտեսական համագործակցության ոլորտում փոխադարձաբար կարեւորվել են պետական ու մասնավոր հատվածի համագործակցության սերտացումը, համատեղ ներդրումների խրախուսումը, մասնավորապես` ջրային տնտեսության կառավարման, ճանապարհաշինության, հեռահաղորդակցության բնագավառներում։