Նախընտրելի
Հայաստանի գլխավոր դատախազ Աղվան Հովսեփյանն ընդունել է ԵԽ գլխավոր քարտուղարի հատուկ ներկայացուցիչ Սիլվիա Զեհեին: Հանդիպման ընթացքում քննարկվել են հոկտեմբերի 19-21-ը Երեւանում կայանալիք Եվրոպայի դատախազների խորհրդատվական խորհրդի 5-րդ լիագումար նիստի նախապատրաստական աշխատանքներին վերաբերող հարցեր:
Ինչպես NEWS.am-ը տեղեկանում է ՀՀ գլխավոր դատախազության մամուլի ծառայությունից, Եվրոպայի դատախազների խորհրդատվական խորհրդի լիագումար նիստը Հայաստանում տեղի է ունենում առաջին անգամ , որի աշխատանքներին մասնակցելու համար Հայաստան կժամանեն 33 երկրներից 42 պատվիրակներ: Նիստում նախատեսվում է քննարկել անչափահասների վերաբերյալ քրեական գործերով արդարադատության իրականացման, ինչպես նաեւ քրեակատարողական ոլորտում դատախազության դերին վերաբերող հարցեր: Հոկտեմբերի 20-ին տեղի կունենա Եվրոպայի դատախազների խորհրդատվական խորհրդի նախագահի, փոխնախագահի, ինչպես նաեւ Խորհրդի բյուրոյի անդամների ընտրությունը: ԵԴԽԽ լիագումար նիստի աշխատանքները կամփոփվեն հոկտեմբերի 21-ին:
Աշխատանքային քննարկումներին զուգահեռ պատվիրակներին հնարավորություն կընձեռվի ծանոթանալ Հայաստանի պատմությանը, պատմամշակութային հուշարձաններին:
