ՆախընտրելիՀայաստանի ԱԳ նախարար Էդվարդ Նալբանդյանը հայտարարություն է տարածել, որտեղ ողջունում է Ֆրանսիայի Սենատի կողմից Հայոց ցեղասպանությունը քրեականացնող օրինագծի ընդունումը:
ԱԳՆ-ից NEWS.am-ին հայտնում են, որ Նալբանդյանի հայտարարությունում, մասնավորապես, ասվում է.
Ողջունում ենք Ֆրանսիայի Սենատի կողմից, դեռ ամռանը Ազգային ժողովում հաստատված օրինագծում՝ Հայոց ցեղասպանության ժխտումը քրեականացնող դրույթի հաստատումը:
Այս քայլով Ֆրանսիան կրկին անգամ վերահաստատում է իր արժեքավոր դերակատարումը անցյալում իրականացված ցեղասպանությունների դատապարտման եւ ժխտողականության դեմ պայքարի, ինչպես նաեւ՝ մարդկության դեմ հնարավոր նոր ոճիրների կանխարգելման գործում»:
Ավելի վաղ NEWS.am-ը հայտնել էր, որ Ֆրանսիայի Սենատն այսօր՝ հոկտեմբերի 14-ին, ընդունել է Հայոց ցեղասպանության ժխտումը քրեականացնող օրինագիծը. «Քաղաքացիություն եւ ազատություն» օրենքի բարեփոխված տարբերակին կողմ է քվեարկել 156, դեմ` 146 պատգամավոր:
