ՀՀ վարչապետ Կարեն Կարապետյանը հանդիպել է պաշտոնական այցով Հայաստան ժամանած Իրանի Իսլամական Հանրապետության Նախագահ Հասան Ռոհանիի հետ:

«Շատ ուրախ ենք հանդիպել Ձեզ եւ հյուրընկալվել մեր լավ բարեկամ հայ ժողովրդին»,- նշել է Հասան Ռոհանին՝ ավելացնելով, որ ՀՀ Նախագահ Սերժ Սարգսյանի հետ բանակցությունների արդյունքում ձեռք են բերվել մի շարք համաձայնություններ եւ պայմանավորվածություններ: Հասան Ռոհանին միաժամանակ հույս է հայտնել, որ ապագայում ականատես կլինեն այդ ծրագրերի կյանքի կոչմանը:

Վարչապետ Կարեն Կարապետյանը, ողջունելով Իրանի Իսլամական Հանրապետության Նախագահ Հասան Ռոհանիի այցը Հայաստանի Հանրապետություն, նշել է, որ հայ-իրանական երկկողմ համագործակցության օրակարգը հագեցած է հարուստ բովանդակությամբ, որը ամուր հիմք է ստեղծում հետագա հարաբերությունների զարգացման ու ընդլայնման համար:

ՀՀ վարչապետն իր հերթին ներկայացրել է մի շարք առաջարկություններ, որոնց իրականացումն էլ ավելի կամրապնդի հայ-իրանական տնտեսական կապերը եւ նոր լիցք կհաղորդի հետագա համագործակցությանը: Մասնավորապես, առաջարկվել է իրանական կողմի հետ դիտարկել Հայաստանում սննդամթերքի սետիֆիկացման կենտրոնի ստեղծման գաղափարը, որը կնպաստի ապրանքատեսակների համապատասխանության գնահատման գործընթացի դյուրացմանն ու առեւտրաշրջանառության աճին:

Հատկանշելով Հայաստանի եւ Իրանի ազատ տնտեսական գոտիների համագործակցությունը՝ վարչապետ Կարապետյանն առեւտրաշրջանառության խթանման տեսանկյունից կարեւորել է նաեւ իրանական ընկերությունների գործունեության ընդլայնումը Հայաստանում՝ հաշվի առնելով Եվրասիական տնտեսական միության շուկայի հնարավորությունները:

Վարչապետ Կարեն Կարապետյանը կրկին վերահաստատել է Հայաստանի պատրաստակամությունը՝ սերտորեն աջակցելու Իրան-ԵԱՏՄ բանակցային գործընթացում:

Անդրադարձ է եղել տարանցիկ փոխադրումների գործընթացի պարզեցման, զբոսաշրջության ներուժի իրացման եւ փոխադարձ ուղեւորահոսքերի ավելացման հետ կապված օրակարգային հարցերին:

Նախագահ Հասան Ռոհանին դրական է գնահատել հայ-իրանական փոխգործակցության խթանմանն ուղղված քայլերը եւ նշել, որ իրանական կողմը խրախուսում է երկկողմ հարաբերություններիր զարգացմանն ուղղված ցանկացած կառուցողական առաջարկություն: