Գարեգին Նժդեհի կամ, ինչպես ժողովուրդն է ասում, «Վստրեչի» կամրջի վերկառուցման աշխատանքները, որոնք Երեւանի քաղաքապետարանի ծրագրերով սկսվել էին այս տարվա մարտին,  ավարտված են։ Կամուրջը  նոյեմբերի 3 -ից  երթեւեկության համար բաց է:

Երեւանի քաղաքապետարանի մամուլի ծառայությունից NEWS.am-ին հայտնում են, որ կամուրջը բացելուց հետո, քաղաքապետ Գագիկ Բեգլարյանը վարչական շրջանների ղեկավարների ու բազմաթիվ երեւանցիների հետ միասին  քայլելով անցել է Էրեբունի շրջանը Շենգավիթին կապող կամրջի վրայով, իսկ մյուս ծայրին նրանց դիմավորել են շենգավիթցիները։

1968-ին շահագործման հանձնված կամուրջը նախկինում երբեւէ չէր  հիմնանորոգվել։ 1985 թ. կամրջի տակ բռնկված  հրդեհի  պատճառով  ուղետարի  կրող կոնստրուկցիաները  լրջորեն վնասվել էին, ինչի  հետեւանքով դրանց կրողունակությունը նվազել էր: 1997 թվականից կամուրջը վթարային էր  ճանաչվել: Ներկայումս կամուրջը համապատասխանում է սեյսմակայնունության 9 բալանոց սանդղակին:

Թարմացվել է կամրջի արտաքին տեսքը՝ տեղադրվել են նոր բազրիքներ։Ասֆալտապատվել է  20 մետր լայնությամբ երթեւեկելի շերտը, նորոգվել են 3 մետր լայնությամբ երկկողմանի մայթերը, անցկացվել է արտաքին լուսավորության նոր համակարգ: