Արցախի Հանրապետության նախագահ Բակո Սահակյանը ընդունել է սահմանադրական հանրաքվեի ընթացքում դիտորդական առաքելության նպատակով Արցախ ժամանած ԱՄՆ-ի, Ռուսաստանի Դաշնության, Կանադայի, Գերմանիայի, Արգենտինայի, Ուրուգվայի պատվիրակություններին։ Նրանց շարքերում եղել են խորհրդարանականներ, դիվանագետներ, քաղաքական գործիչներ, գիտավերլուծական շրջանի եւ քաղաքացիական հասարակության ներկայացուցիչներ։
Ինչպես NEWS.am-ին հայտնել են Արցախի նախագահի մամուլի ծառայությունում՝ Սահակյանը նշել է արտասահմանյան պատվիրակությունների կողմից դիտորդական առաքելության կարեւորությունը՝ հանրապետությունում ժողովրդավարական կառույցների ամրապնդման, տարբեր երկրներում Արցախի մասին օբյեկտիվ տեղեկություն հաղորդելու եւ երկկողմանի հարաբերությունների զարգացման տեսանկյունից։