ՆախընտրելիԱդրբեջանում Ուկրաինայի հյուպատոսը հանդիպել է Բաքվում կալանքի մեջ գտնվող բլոգեր Ալեքսանդր Լապշինի հետ:
Լապշինի փաստաբան Էդուարդ Չերնին «ՌԻԱ Նովոստի»-ին հայտնել է, որ կալանավորվածը պահման պայմաններից չի դժգոհել եւ սպասում է քննության ավարտին:
«Իմ պաշտպանյալն ինձ հայտնել է, որ իր հետ հանդիպել է Բաքվում Ուկրաինայի հյուպատոսը: Ինձ հետ հանդիպման ժամանակ նա պահման պայմաններից չի դժգոհել, իրավիճակը նորմալ է: Լապշինը գոհ է քննության ընթացքից եւ սպասում է ավարտին»,- նշել է Չերնին:
Ավելի վաղ NEWS.am-ը հայտնել էր, որ Ռուսաստանի եւ Իսրայելի քաղաքացի Ալեքսանդր Լապշինը ձերբակալվել է 2016-ի դեկտեմբերին Մինսկում՝ Ադրբեջանի պահանջով, որտեղ նա ներառված է «սեւ ցուցակում» ԼՂՀ այցելության համար։
Նման անձանց մուտքն Ադրբեջան արգելվում է, Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ հետախուզում էր հայտարարել՝ «Պետական սահմանի մասին» օրենքը խախտելու համար:
Հունվարի 17–ին Բելառուսի դատախազությունը որոշել էր բավարարել Ադրբեջանի պահանջը եւ արտահանձնել Լապշինին Ադրբեջանին։ Իսկ հունվարի 26–ին Մինսկի դատարանը մերժել էր Լապշինի փաստաբանների բողոքը:
Ռուսաստանը եւ Իսրայելը փորձել են հասնել արտահանձնման որոշման չեղարկմանը: Սակայն Բելառուսի նախագահ Ալեքսանդր Լուկաշենկոյի վերջերս կայացած մամուլի ասուլիսից հետո ակնհայտ էր, որ Լապշինին կարտահանձնեն:
Փետրվարի 7-ի երեկոյան Ալեքսանդր Լապշինին Բաքու են տեղափոխել:
