Հոգեւոր տոների հանդեպ երիտասարդների հետաքրքրությունը մեծացել է, սակայն նրանք ունեն հոգեւոր գիտելիքների պակաս: Այս մասին այսօր` ապրիլի 14-ին, լրագրողների հետ զրույցում նշեց  Տեր Հակոբ քահանա Խաչատրյանը:

Նրա խոսքով` Սուրբ Հարության տոնն ավելի ընկալելի դարձնելու համար, պետք է նախ Մեծ Պահքի բոլոր կիրակիների խորհուրդներն իմանալ, եւ որ Աստծուն չժխտել, դեռ չի նշանակում հավատալ նրան, իսկ հավատալ հնարավոր է միայն հոգեւոր գիտելիքներ ունենալու դեպքում:

«Մեծ Պահքը սկսվում է դրախտից եւ ավարտվում է դրախտում: Պահքի ընթացքում բոլոր կիրակիները իրենց խորհուրդը ունեն եւ առաջին հերթին դրանք պետք է իմանալ: Առաջին կիրակին` բարեկենդանը, նշանավորվում է Ադամի եւ Եվայի դրախտում գտնվելով, երկրորդը` նրանց արտաքսումով: Երրորդ կիրակին անառակ որդու վերադարձի ավարտն է, որը դեռ կարող է վերադառնալ դրախտ, չորրորդը` դատավորի կիրակին: Հինգերորդը` տնտեսի կիրակին է, այն ցույց է տալիս, թե մեզնից յուրաքանչյուրը ինչ առաքելություն ունի այս երկրի վրա: Վեցերորոդ կիրակին ավարտված եւ սպասվելիք իրողություններովն է, այնսինքն` Քրիստոսի առաջին գալուստը ավարտված իրողությունն է, իսկ սպասվելիքը` նրա երկրորդ գալուստն է»,-ասաց նա:

Վերջինը ավագ շաբաթն է, որը խտացնում է Քրիստոսի կյանքի վերջին շրջանը:

Անդրադառնալով Զատիկի ձվերի գույնին` հոգեւորականը նշեց, որ ցանկալի է դրանք կարմիր լինեն, քանի որ այն արյունով ներկելու խորհուրդը ունի.«Քրիստոսի արյունով ներկվեցին դրանք»:

Նրա խոսքով` հոգեւոր այս տոնը կանգառի հնարավորություն է տալիս մարդկանց տեսնելու եւ գնահատելու այն, ինչ նրանք արել են անցյալում, եւ հետհայացք գցելով` ուղղել գործած սխալները:

Հիշեցնենք, որ Հիսուս Քրիստոսի հրաշափառ Հարության տոնը կոչվում է նաեւ Զատիկ, որը նշանակում է զատում, բաժանում, հեռացում մեղքերից եւ վերադարձ առ Աստված: Զատիկը Հայ Առաքելական Ս. Եկեղեցու 5 տաղավար տոներից մեկն է:

Քրիստոսի հարության լուրը կանայք ավետեցին առաքյալներին, որից հետո Հիսուսը երեւաց նրանց: Քրիստոսի Հարությունը դարձավ քրիստոնեական վարդապետության եւ հավատի հիմքը:

Ս. Հարության տոնի նախընթաց երեկոյան եկեղեցիներում մատուցվում է Ճրագալույցի Ս. Պատարագ, որով սկսվում են զատկական տոնակատարությունները: Առավոտյան եկեղեցիներում կատարվում է ժամերգություն, Անդաստանի արարողություն, ապա մատուցվում տոնական Ս. Պատարագ: Ս. Հարության տոնին հավատացյալները միմյանց ողջունում են «Քրիստոս Յարեաւ ի մեռելոց» ավետիսով, պատասխանում՝ «Օրհնեալ է Յարութիւնն Քրիստոսի»:

Զատկի տոնին հավատացյալները ձու են ներկում: Ներկված ձուն համարվում է Հարության եւ նոր կյանքի խորհրդանիշ: Կարմիր գույնը խորհրդանշում է խաչյալ Հիսուսի կենդանարար արյունը, որ թափվեց մարդկության փրկության համար:

Հիսուս Քրիստոսի հրաշափառ Հարության տոնը Հայ Եկեղեցին նշում է հիսուն օր շարունակ՝ մինչեւ Հոգեգալստյան տոն (Պենտեկոստե): Այս ընթացքը կոչվում է Հինանց շրջան կամ Հինունք, որը ծագում է «հիսունք» բառից: