նախընտրելի դարձնելԿալանավորված բլոգեր Ալեքսանդր Լապշինին տեղափոխել են Բաքվի քննչական մեկուսարանի բուժկետ։ Այս մասին Trend–ին տված հարցազրույցում ասել է նրա փաստաբան Էդուարդ Չերնինը։
Հիմա Լապշինը բուժում է ստանում բուժկետում, հայտնել է փաստաբանը։ Նրա խոսքով մինչ այդ Լապշինը դժգոհում էր սրտի հատվածում ցավերից, հետո նրան տարել են բուժզննման՝ մասնավոր կլինիկաներից մեկում, որտեղ նրա մոտ ախտորոշել են «տախիկարդիա»։
Հիմա Լապշինն իրեն նորմալ է զգում, հավելել է Չերնինը։
Հիշեցնենք, որ Ռուսաստանի, Իսրայելի եւ մի շարք երկրների քաղաքացի Ալեքսանդր Լապշինը ձերբակալվել է 2016-ի դեկտեմբերին Մինսկում՝ Ադրբեջանի պահանջով, որտեղ նա ներառված է «սեւ ցուցակում» ԼՂՀ այցելության համար։
Նման անձանց մուտքն Ադրբեջան արգելվում է, Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ հետախուզում էր հայտարարել՝ «Պետական սահմանի մասին» օրենքը խախտելու համար:
Հունվարի 17–ին Բելառուսի դատախազությունը որոշել էր բավարարել Ադրբեջանի պահանջը եւ արտահանձնել Լապշինին Ադրբեջանին։ Իսկ հունվարի 26–ին Մինսկի դատարանը մերժել էր Լապշինի փաստաբանների բողոքը:
Ռուսաստանը եւ Իսրայելը փորձել են հասնել արտահանձնման որոշման չեղարկմանը: Սակայն Բելառուսի նախագահ Ալեքսանդր Լուկաշենկոյի վերջերս կայացած մամուլի ասուլիսից հետո ակնհայտ էր, որ Լապշինին կարտահանձնեն:
Փետրվարի 7-ի երեկոյան Ալեքսանդր Լապշինին Բաքու են տեղափոխել:
