նախընտրելի դարձնել
Նոյեմբերի 17-ին Երեւանում տեղի է ունեցել Հայաստանի եւ Ճապոնիայի ԱԳՆ-ների միջեւ քաղաքական խորհրդատվություններ:
ԱԳՆ մամուլի ծառայությունից NEWS.am-ին հայտնում են, որ հայկական կողմից պատվիրակությունը գլխավորել է ՀՀ ԱԳ նախարարի տեղակալ Սերգեյ Մանասարյանը, ճապոնական կողմից` Ճապոնիայի ԱԳՆ Կովկասի հարցերով հատուկ ներկայացուցիչ Մասարու Վատանաբեն:
Խորհրդատվությունների ընթացքում կողմերը քննարկել են երկկողմ հարաբերություներին առնչվող հարցերի լայն շրջանակ. իրավապայմանագրային դաշտի զարգացման, միջազգային կազմակերպություններում համագործակցության, տնտեսական համագործակցության, առեւտրատնտեսական կապերի խրախուսման, մշակութային կապերի ակտիվացման վերաբերյալ հարցեր:
Անդրադարձ է կատարվել նաեւ տարածաշրջանային խնդիրներին: Ճապոնացի դիվանագետների խնդրանքով ներկայացվել է արցախյան հակամարտության կարգավորման գործընթացի վերջին զարգացումները: Ճապոնական կողմը հայտնել է իր աջակցությունը ԵԱՀԿ Մինսկի խմբի շրջանակներում ընթացող Լեռնային Ղարաբաղի հակամարտության կարգավորման բանակցային գործընթացին:
Խորհրդատվությունների ավարտից հետո Ճապոնիայի պատվիրակության ղեկավարը ԱԳՆ դիվանագիտական դպրոցում հանդես է եկել «Արեւելյան Ասիան եւ Ճապոնիան» թեմայով դասախոսությամբ:
