Պարզ է, որ 40- 45 հազար դրամ աշխատավարձով գոյությունները քարշ տվող ու տղամարդկային ու ստեղծագործող մարդու արժանապատվությունը ոտնահարված մշակութային գործիչները պետք է հոտով տեր փնտրեն ու, ցավոք, տիրոջ փնտրտուքը նրանց դեպի պետություն չի տանում, այլ այս կամ այն կուսակցության գրասենյակ:

Նման տեսակետ է հայտնել ՀՅԴ խմբակցության պատգամավոր Լիլիթ Գալստյանը, անդրադառնալով Հայաստանի մշակույթի ոլորտում բյուջեով սահմանված  աշխատավարձերի խնդրին:

Նրա խոսքով, մշակույթի գործիչները տարիների ընթացքում նայած կոալիցիայի կազմից, մի քանի կուսակցություն ու կրծքանշան են փոխում: «Սա իսկապես ողբերգություն է, պետականությունը վտանգող ողբերգություն: Եվ քանի դեռ չկա այն   ընկալումն ու իմաստավորումը, որ  մշակույթը   քաղաքական արժեհամակարգի բաղադրիչ է եւ միայն մտածված մշակութային քաղաքականության իրականացման ճանապարհով կարելի է  հասնել տվյալ երկրի առաջ կանգնած ռազմավարական խնդիրների լուծմանը, սեփական պետության մեջ հայ մարդը ուրիշ տեր պիտի փնտրի, այդպես էլ քաղաքացի չի դառնա ու քաղաքացիական հասարուկություն դժվար թե ունենանք»,- ամփոփել է նա:

Նշենք, որ 2011-ի բյուջեով մշակույթի ոլորտում նախատեսվում է 12-15 տոկոս աշխատավարձի բարձրացում, որից հետո համակարգի  շուրջ՝ 6080 աշխատողների միջին աշխատավարձը 57.000-ի սահմանում է լինելու, ինչը հանրապետության միջին աշխատավարձից մոտ 2 անգամ ցածր է: