նախընտրելի դարձնել
Հայաստանի վարչապետ Տիգրան Սարգսյանն այսօր` նոյեմբերի 26-ին մասնակցել է ՀՀ ոստիկանության անձնագրային եւ վիզաների վարչության Նոր Նորքի անձնագրային բաժանմունքի նոր` վերակառուցված եւ տեխնիկապես վերազինված մասնաշենքի բացմանը:
Կառավարության մամուլի ծառայությունից NEWS.am-ին հայտնում են, որ Նոր Նորքի անձնագրային բաժանմունքը կապիտալ վերանորոգվել է ՀՀ ոստիկանության անձնագրային եւ վիզաների վարչությունում իրականացվող շարունակական բարեփոխումների արդյունքում, որոնց շրջանակում նախատեսվում է տարածքային անձնագրային ծառայությունների վերակառուցում ու տեխնիկական վերազինում:
ՀՀ կառավարության ղեկավարը ՀՀ ոստիկանապետ Ալիկ Սարգսյանի հետ նոր մասնաշենքի մուտքը երիզող ժապավենը կտրելուց հետո շրջել է վերանորոգված բաժանմունքի սենյակներով, ծանոթացել աշխատանքային պայմաններին եւ քաղաքացիների սպասարկման հետ կապված նորամուծություններին:
Լրագրողների հետ ճեպազրույցում Տիգրան Սարգսյանը, մասնավորապես, նշել է. «Նորամուծությունները հնարավորություն են տալու ՀՀ քաղաքացիներին ստանալ ավելի լիակատար տեղեկատվություն, ունենալ ընտրության հնարավորություն, ինչպես նաեւ օգտվել այլընտրանքային աղբյուրներից: Վճարումներն իրականացվելու են էլեկտրոնային եղանակով, եւ կոռուպցիոն ռիսկերն այդ պարագայում իսպառ բացառվում են: Կտրոնն ստանալով` քաղաքացին այն միանգամից ներկայացնում է սպասարկողին: Այսինքն` սրանով ոչ միայն որակյալ ծառայություններ են մատուցվելու, այլեւ կոռուպցիոն ռիսկերն են էապես նվազելու»: Խոսելով բարեփոխումների շարունակականության կարեւորությունից` վարչապետ Սարգսյանն ընդգծել է, որ արվելու է առավելագույնը ՀՀ ոստիկանության անձնագրային եւ վիզաների վարչության բոլոր բաժանմունքներում նման ծառայություններ մատուցելու համար:
Նշենք, որ Նոր Նորքի նորակառույց անձնագրային բաժանմունքը վերազինված է ժամանակակից տեխնոլոգիաներով, ինչն էլ կնպաստի քաղաքացիների առավել քաղաքակիրթ, արդյունավետ եւ թափանցիկ սպասարկման ապահովմանը:
