նախընտրելի դարձնելԵԱՀԿ Խորհրդարանական վեհաժողովի Հարավային Կովկասի հարցերով հատուկ ներկայացուցիչ Քրիստիան Վիգենինը նորից հայտարարել է Լեռնային Ղարաբաղի հակամարտության խաղաղ կարգավորման անհրաժեշտության մասին՝ հաշվի առնելով հազարավոր մարդկանց, մասնավորապես ձգձգված հակամարտության պատճառով տուժածների շահերը:
Այս մասին Հայաստան կատարած այցի արդյունքերից հետո ասվում է ԵԱՀԿ ԽՎ մամուլի ծառայության հայտարարության մեջ:
Նշվում է, որ պաշտոնատար անձանցից բացի Վիգենինը հանդիպել է նաեւ քաղաքացիական հասարակության ներկայացուցիչների՝ Երեւանի պետական համալսարանի ուսանողների, ինչպես նաեւ Ղարաբաղի Թալիշ գյուղի մի քանի բնակիչների հետ:
Նշվում է, որ գյուղը 2016 թ. ապրիլին Ադրբեջանի ագրեսիայի հետեւանքով հարձակման է ենթարկվել եւ լուրջ վնասներ կրել:
«Այս շաբաթ հանդիպելով շփման գծի երկու կողմերի մարդկանց հետ, որոնք շարունակում են տառապել երկարատեւ հակամարտության պատճառով, ես կրկնում եմ, այն պետք է ավարտվի: Հակամարտությունը շարունակում է ազդել հարյուր հազարավոր մարդկանց առօրյա կյանքի վրա», - ասել է նա
Վիգենինը հաստատել է իր աջակցությունը ԵԱՀԿ Մինսկի խմբի աշխատանքին եւ նրա համանախագահներին՝ նշելով, որ կողմերի քաղաքական ղեկավարություններն են պատասխանատվություն կրում: Նա նաեւ ողջունել է մոտ ապագայում Հայաստանի եւ Ադրբեջանի նախագահների հանդիպման ծրագրերը:
Հատուկ ներկայացուցիչը հոկտեմբերի 4-ին ԵԱՀԿ Խորհրդարանական վեհաժողովի մշտական կոմիտեում տարածաշրջանային այցի մասին զեկույցով հանդես կգա եւ կներկայացնի տարածաշրջանում ապագա մասնակցության վերաբերյալ կոնկրետ առաջարկներ:
