Այսօր՝ դեկտեմբերի 10-ին Երեւանի քաղաքապետի ժամանակավոր պաշտոնակատար Տարոն Մարգարյանը հանձնարարել է մինչեւ դեկտեմբերի 20-ը  ավարտել այս տարվա համար նախատեսված բարեկարգման բոլոր աշխատանքները: Այս մասին խորհրդակցությունից հետո հայտնել է Մալաթիա- Սեբաստիա վարչական շրջանի ղեկավար Դավիթ Օհանյանը:

Քաղաքապետարանի մամուլի ծառայությունից NEWS.am-ին հայտնում են, որ Քանաքեռ-Զեյթուն վարչական շրջանի ղեկավար Արայիկ Քոթանջյանը խոսել է ձմռան նախապատրաստական աշխատանքների մասին. «Հանձնարարական տրվեց  տեխնիկան եւ մեքենա սարքավորումները բերել վերջնական պատրաստ վիճակի: Սահմանված է հսկողություն, որպեսզի  բնակֆոնդը, մանկապարտեզներն ու դպրոցները պատրաստ լինեն ձմռանը եւ ձյան տեղումներին»,- նշել է Արայիկ Քոթանջյանը: Ըստ նրա,  դեկտեմբերի  կեսերին սպասվող տեղումներին մայրաքաղաքի վարչական շրջանները պատրաստ են . «Ունենք  աղի եւ ավազի անհրաժեշտ պաշար, տեղումներն առատ լինելու դեպքում ըստ նախնական պայմանագրի` կարող ենք   նոր քանակություն եւս  ձեռք բերել»:

«Երքաղլույս» ընկերության տնօրեն Սամվել Գաբրիելյանը տեղեկացրել է, որ նախատոնական աշխատանքները դեռ շարունակվում են: Երեւանի քաղաքապետի ժամանակավոր պաշտոնակատարի հանձնարարությամբ տոնածառերին  հարակից հրապարակներն  ու փողոցները պետք է  ապահովված լինեն տոնական լուսավորությամբ: «Մայրաքաղաքի ամանորյա  լուսավորությունը լինելու  է ճոխ, աշխույժ եւ ուրախ, որը տարածված կլինի ոչ միայն կենտրոնում, այլեւ բոլոր 12 վարչական շրջաններում: Տոնական լուսավորության համար փողոցներում տեղադրվում են հատուկ այդ նպատակով Ֆրանսիայից եւ Հունաստանից ներկրված  լուսատուներ»,- նշել է Սամվել Գաբրիելյանը: