նախընտրելի դարձնելՄայր Աթոռ Սուրբ Էջմիածնի «Վաչե եւ Թամար Մանուկյան» մատենադարանում հոկտեմբերի 31-ին Եկեղեցիների համաշխարհային խորհրդի հայաստանյան Կլոր սեղան (Կլոր սեղան) հիմնադրամի նախաձեռնությամբ անցկացվեց «Տարածաշրջանային խաղաղություն. իրողություններ եւ հեռանկարներ» խորագրով միջազգային համաժողովը:
Մայր Աթոռի տեղեկատվական համակարգից NEWS.am-ին հայտնում են, որ համաժողովը բացվեց տերունական աղոթքով, որից հետո ողջույնի եւ բացման խոսք հղեցին Մայր Աթոռ Սուրբ Էջմիածնի արտաքին հարաբերությունների եւ արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը, ՀՀ Ազգային ժողովի նախագահի տեղակալ Էդուարդ Շարմազանվը, Հայաստանի Հանրապետությունում Ռուսաստանի Դաշնության դեսպանատան խորհրդական Ալեքսանդր Վասիլեւը եւ Երեւանի Կապույտ Մզկիթի հավաքական աղոթքի իմամ Ալի Շաջաանը:
«Կրոնների եւ մշակույթների դերը խաղաղության եւ համագործակցության հաստատման գործընթացում» թեմայի վերաբերյալ ելույթներ ունեցան Մայր Աթոռ Սուրբ Էջմիածնի Միջեկեղեցական հարաբերությունների բաժնի տնօրեն Հոգեշնորհ Տ. Շահե ծայրագույն վարդապետ Անանյանը, Հայաստանում Իրանի Իսլամական Հանրապեության դեսպանատան մշակույթի կենտրոնի խորհրդական Սեյյեդ Մոհամմադ Ռեզա Հեյդարին:
ԱՊՀ երկրների ինստիտուտի հայաստանյան մասնաճյուղի տնօրեն, քաղաքագետ Ալեքսանդր Մարկարովը եւ Երեւանի մամուլի ակումբի նախագահ Բորիս Նավասարդյանը խոսեցին Հայաստանի եւ հարեւանների միջեւ հարաբերությունների զարգացման տեսլականի մասին:
Տարածաշրջանային բազմազանության մարտահրավերների եւ հնարավորությունների մասին իրենց տեսլականը ներկայացրեցին Թուրքիայից ժամանած մարդաբան Ադնան Չելիքը, լրագրող Սերդար Քորուջուն, Վրաստանի տարածաշրջանային անվտանգության հարավկովկասյան ինստիտուտի տնօրեն Ալեքսանդր Ռուսեցկին, Կովկասյան աշխարհաքաղաքական ակումբի քարտուղար, քաղաքագետ Յանա Ամելինան, Երեւանի Պետական Համալսարանի Արեւելագիտության ֆակուլտետի դեկան Ռուբեն Մելքոնյանը, նույն բուհի Միջազգային հարաբերությունների եւ դիվանագիտության ամբիոնի վարիչ Վահրամ Պետրոսյանը:
Համաժողովի ավարտին ընդունված կոմյունիկեում մասնակիցները կարեւոր համարեցին խաղաղությանը եւ կայունությանը խանգարող այլ սպառնալիքների պայմաններում փոխըմբռնման, հանդուրժողականության, փոխզիջումների եւ կարեւորությունը: Ըստ մասնակիցների՝ հակամարտությունների եւ փակ սահմանների ցավալի իրողությունների կարգավորման գործում խաղաղ բանակցություններին եւ կառուցողական երկխոսությանը բանական այլընտրանք չկա:
Նրանք համոզմունք հայտնեցին՝ պաշտոնական մակարդակով վարվող բարձրաստիճան բանակցություններին զուգընթաց մեծ կարեւորություն ունեն նաեւ տարածաշրջանի, հատկապես՝ Հայաստանի եւ Ադրբեջանի հոգեւոր առաջնորդների, հասարակական, միջկրոնական եւ միջմշակութային շփումները, երկխոսության հարթակների հաստատումն ու հզորացումը:
Մասնակիցները նաեւ համոզմունք հայտնեցին, որ միջկրոնական կապերը եւ համագործակցությունը հզոր գործոն կարող են հանդիսանալ տարածաշրջանի ժողովուրդների միջեւ գործնական համագործակցության հաստատման համար եւ նպաստել հանդուրժողականության տարածմանը:
Հայաստանի, Ռուսաստանի, Վրաստանի, Իրանի միջեւ բազմադարյա բարեկամական եւ գործընկերային հարաբերությունների ավանդույթը բարձր գնահատելով՝ մասնակիցները հույս հայտնեցին, որ ապագայում կհարթվեն եւ կկարգավորվեն նաեւ հարաբերությունները Հայաստանի եւ Թուրքիայի միջեւ կհաստատվեն առանց նախապայմանի դիվանագիտական հարաբերություններ:
Մասնակիցները պատրաստակամություն հայտնեցին բոլոր հնարավոր միջոցներով ներդրում ունենալ երկխոսության եւ խաղաղության հաստատման պատվաբեր գործում, ինչը կթուլացնի առկա միջազգային լարվածությունը եւ զգայուն իրավիճակը եւ կնպաստի խաղաղության ու կայունության հաստատմանը:
